Энэ номой согсолборилогшо Надежда Циденовна Цибудеева олон жэлдэ буянтай ажал хэжэ, буряад арадтаа иимэ томо бэлэг бариба гээшэ. Ном соо мэргэжэлтэ хүгжэмшэдэй, өөрын дураар зохёодог хүгжэмшэдэй, арадай дуунууд, ёохорой, хатарай дуунууд
хананхатайгаар суглуулагдажа “Буряад Үнэн” хэблэлэй байшанда хэблэгдээ юм. Н. Ц. Цибудеева Буряадай Республикын габьяата ажал ябуулагша, искусствын эрдэмэй кандидат, сэтгүүлшэн хүн байна. Номой танилсалгын үедэ олон зон үгэ хэлэхэдээ, дуушадай, хүгжэмэй училищиин һурагшадай, хүгжэмшэдэй, дуунда дуратайшуулай үнихэнэй хүлеэһэн ном нара хараба, энэ ном буряад айл бүхэнэй һонирхол татаа һаа һайн байгаа, буряад аялгын амиды байһан сагта буряад хэлэн хүгжэхэ, буряад арадта шухала хэрэгтэй
энэ номые Буряадай Гүрэнэй шанда зууршалха байгаа гэхэ мэтэ
һанамжанууд хэлэгдэбэ.
- “Зандан эрхи” номтой танилсахадаа, дуун бүхэнэй нотыень даган гүнгэнэхэдөө, бага балшар наһаяа, эмгээ эжыгээ һанаад уярааб,
ажалаа улам саашань үргэлжэлүүлжэ, үшөө номуудые хэблэхэтнай
болтогой, – гэжэ хүгжэмэй багшын хэлэхэдэ, заал соо һуугшад
халуун альга ташалгаар тэрэниие дэмжэбэ. Мэргэжэлтэ хүгжэмшэд
В. А. Усович, Ж. Д. Дандаров, Л. Санжиева, К. К. Миткинов, хүгжэмэй
училищиин багшанар болон бусад туйлай ехэ, харюусалгатай ажал
хэгдээ, буряад арадай дуунуудые ирагуу гоё болгожо
тааруулагдаа(гармонизация), энэ номой түлөө баярые хүргэнэбди
гэжэ хэлэбэ. Сэсэн ухаатай, сэбэр сэдьхэлтэй, бэлиг талаантай
Надежда Циденовна Цибудеевада зоригоо мүхөөнгүй, дабаан өөдэ
дабшажа, үшөө шэнэ бүтээлнүүдээр улад зоноо баярлуулжа
байхыень хүсэнэб.
Намжилма Бальжинимаева
Зураг дээрэ: баруун гарһаа Клим Карпович Миткинов, Надежда
Циденовна Цибудеева, Жамсаран Дармаевич Дандаров номой
баярай үедэ.
