1990 онһоо Буряад орондо Сагаалганай түрүүшын үдэрые амаралтын үдэр гээд тогтооһон. Тиихэдэ «Сагаалган» гэһэн үндэһэнэй һайндэрые бүгэдэ арад түмэнэй һайндэрэй зэргэ олгохо тухай» Буряадай АССР-эй Верховно Соведэй Президиумэй зарлиг абтаһан байгаа. 2008 ондо энээн тухай баһа хуули абтаа һэн.
Дорно зүгэй (монгол һарын) литээр жэл бүри буддын шажанай зурхайшад шэнэ жэлэй гараха үдэрые тоолон гаргадаг. 2011 ондо шэнын нэгэн февралиин 3-да тудаа, 2012 ондо – февралиин 22. Зурхайн саг уларилай тоогой бэшэгүүдэй ондоотой байдаг ушарһаа Будда бурхантай Түб ба Зүүн урда Азиин оронуудтай Сагаан һарамнай ходо тудадаггүй.
Сагаан һара — монгол туургата арадуудай дээрэ үеын ба эгээл дуратай һайндэр болодог. Сагаалганай үдэрнүүдтэ баяр наадан, спортын тэмсээнүүд, эстрадын дуунай тэмсээн, зүжэг наадан эмхидхэгдэдэг. Баяр нааданай ехэ программа орон нютагтаа ажаһуудаг хүнүүдтэ, мүн баһа холо ойрын аяншад жуулшадта тааруулжа бэлдэдэг.
Сагаан һараһаа гурбан үдэр урид дасан дугануудта хурал хурагдажа эхилдэг. Түбэдэй ба монгол хэлэтэ арадуудай ехэ сахюусан Балдан Һама бурханда зорюулагдаһан уншалгын удаа Бандида хамба лама Дамба Аюшеев шэнэ гараһан һараар амаршалжа адислаха юм. Сагаан һарын үдэрнүүдтэ буряадууд аха заханараа золгодог, түрэлхид танилаараа ябалсадаг, бэе бэедээ айлшалдаг заншалтай. Нэгэ нютагайхин уулзажа сугларжа бэе бэеэ амаршалжа, зугаа наадаа дэлгээдэг.
