Зарим соёлой томохон проектнүүдтэ бэлдэхэ ажал 2012 ондо эхилһэн байгаа.
Соёлой сайд Тимур Цыбиковай хэлэһэнэй ёһоор, федеральна хэмжээндэ хоёр үзэсхэлэн эмхидхэхэ тухай шиидхэбэри абтанхай. Тэдэнэй нэгэниинь Санкт-Петербург хотодо Сената ба Синодын түүхэтэ байшан дотор байдаг Б. Н. Ельцинэй нэрэмжэтэ Юрэнхылэгшын номой санда дэлгээгдэхэ. 2013 оной майн 14-дэ нээлтээ хэхэ тэрэ үзэсхэлэндэ Буряадай Үндэһэнэй номой сангай хоморой шухаг номуудай электрон хэлбэринь харуулагдаха. Тиихэдэ Буряадта ажаһуудаг арад зоной улас түрын, социальна-эдэй засагай ба оюун ухаанай хүгжэлтэ харуулһан Үндэһэнэй музейн ба Үндэһэнэй архивай жасын электрон танилсуулга үнгэржэ байха юм. Нүгөөдэ үзэсхэлэн бол М. Н. Хангаловай нэрэмжэтэ Буряадай түүхын музейдэ хараалагдана. Эндэ «Москвагай Хэрэм» гэжэ гүрэнэй түүхэ соёлой музей-заповеднигэй жасын хоморой үзэмэрнүүд харуулагдаха. Энээхэн «Ехэ Петрһоо Павла I хүрэтэр» гэһэн үзэсхэлэндэ Ородой холбоото уласай соёлой яаман 3,5 миллион түхэриг һомолно, тэрэ мүнгэн үзмэрэй даадхал, зам тээбэридэ гаршалагдаха юм.
2013 оной февралиин 2-һоо 9 болотор Москвада «Тушино» галерейн үзэсхэлэнэй заал соо «Буряадай соёл урлал» гэһэн үзэсхэлэн эмхидхэгдэхэ. Тэрэ үзэсхэлэндэ мүнгэн, модон, хүрэл, мориной дэлһэн бүтээлнүүд харуулагдаха.
2013 оной май соо Буряад Республикын Үндэһэнэй номой санда «Буряадай түүхын хуудаһанууд» үзэсхэлэн нээгдэхэ. Июниин 1-дэ баяр ёһололой суглаан ба Түб стадион соо Сурхарбаан-Наадам үнгэргэгдэхэ.
