Хоёрдугаар hарын 21-дэ шэлэн абалгын нааданууд үнгэржэ, эндэ 11 хүбүүд шалгаржа тодорhон байгаа. Буряад театрай ордон соо hүрөөтэй, hайханаар үнгэрhэн шиираг хүбүүдэй мүрысөөн эрхимэй эрхим гурбые элирүүлээ. Эндэ республикын олохон аймагуудhаа түлөөлэгшэд хабаадаhан, тэдээн сооhоо арбан жалгаар сугларhан агууехэ Хонгоодор Аха, Түнхэн, Захаамин – гурбан аймагуудай түлөөлэгшэд түрүүшүүлэй тоодо тодорбод.
Ахын аймаг. Саяан Үндэрэй арада hуудалтай, уг удамаараа малша, Һоёд гарбалтай Валерий Габановай Зоригто хүбүүн гурбадахи hуури эзэлээ, Зоригто Габанов өөрөө хонин жэлтэй, хориёо дабаhан, эгээл шиираг наhандаа ябана.
Энэ hээр сохилгоор түрүүшын нааданда Зоригтын түрэлхидэй Жахана нютагтаа хаража байhан hарлаг малай 1989 оной hээр нааданай хамаг бүхэшүүлэй гар дамжаад, хухарангүй үлэбэ гэhэн гайхамаар hонин мэдээсэл танай анхаралда дуулганабди. Энэ hээрэй саашанхи хуби заяан тухай Ахын аймагай түлөөлэгшэдэй онсо бодолнууд, hонирхолтой дурадхалнууд бии болоhон хэбэртэй, байн элирхэ байха.
Захааминай аймаг. Уран-Дүшын хормойдо дархашуулай орон боложо тодорhон Санага нютагай түлөөлэгшэ Бэлигтэ Нохоров хоёрдохи hуурида гараа. Бэлигтэ алташа, мүнгэшэ дархашуул, Москва хотодо үнгэрhэн хоёр декадада хабаадалсаhан Абраантан угай Нохоровтанай үри hадаhан, онсолон хэлэбэл Лубсанжаб Нохоровай ехэ хүбүүн хүбүүн Даша-Доржын долоон үхибүүдэй одхон хүбүүн, өөрөө угайнгаа мэргэжэлые үргэлжэлүүлжэ ябаhан залуу дархан гээшэ.
Түнхэнэй аймаг. Түнхэнэй аймагай Хойто-Гол нютагай Даша Манзаров түрүү hуурида тодоржо, солоёо дуудуулаа, угайнгаа малша аба, эжынгээ, тоонто нютагайнгаа алдар нэрые арад зоной дунда үргэбэ гээшэ. Даша өөрөө Хойто-Гол нютагтаа бэеын тамирай багша ажалтай, абань – Николай Жигжитович, эжынь – Тамара Дашеевна хоёр мал ажалтан. Дашын таабай Жигжит Рыгзынович, 95 наhатай сарюун үбгэжөөл, үнгэрhэн ехэ дайнда нютагhаа мордожо хабаадагшадай дундаhаа энэ үедэ гансаараа үлэнхэй, үри бэеынгээ амжалтануудаар омогорхожо hуудаг юм, үшөөл олон жэлнүүд соо алтан нара хаража, айл аймаг соогоо баярлажа hуухань болтогой!
Энэ нааданда илажа гарагшадта хайра шагналнуудшье гэжэ элбэг байгаа. «Залуушуулай нэгэдэл» гэhэн можо хоорондын ниитэ эмхиин байгуулжа эмхидхэhэн, алишье талаараа айхабтар гүнзэгы удхатай, үндэр заяатай энэ нааданай арад зоной анхаралые иигэжэ татаад байхада, аха захатанаа халажа ябаhан залуу hүрэгтөө амжалтануудые, аза жаргал юрөөел даа! Эрхилhэн хэрэгүүдынь хэзээдэшье урагшатай байг лэ!
«Һээр шаалганай» хоёрдохи ехэ нааданууд 2014 ондо Түнхэнэй аймагта үнгэрхэ гэhэн шиидхэбэри абтанхай, хабаадагшадай тоо газар газарhаа бүри олон болохо байха гэhэн найдал байна.
