Саада холын сэнхир нуурнуудта Яруунын түб Нарhатаhаа эхилhэн энэ ябадалдаа театр Галсан Нанзатовай бэшэhэн, Ошор Шагдуровай найруулан табиhан «Тарган Замай ба Мангадхай тухай үльгэр» гэhэн зүжэг, тиихэдэ концерт абажа гараа. Гурбан аймагуудаар ябажа ерэхэ, Яруунын удаа Хориин, Хэжэнгын аймагуудай харагшадтай Сагаан hарынгаа уулзалгануудые үнгэргэжэ бусаха юм. Театрай дэргэдэ байгуулагдаhан «Дэнзэ» бүлгэмэй нэрэ доро үнгэрхэ hонирхолтой концерт абажа гаранхай. Россиин арадай артистнар Лариса Егорова, Михаил Елбонов, Россиин габьяата артистнар Дамбадугар Бочиктоев Олег Бабуев хоёр, тиихэдэ Буряадай арадай артист Зоригто Ринчинов, Буряадай габьяата артистнар Дарима Гылыкова, Баяр Бадмаев, залуу артистнар Гульнара Будаева, Сэсэгма Дондокова, Сэдэн-Ешэ Бимбаев гэгшэд шогтой зугаатай, дуутай, уран уншалгатай концерт аймагуудайнгаа харагшадта Сагаалганай бэлэг болгон дурадхаха байна.
