Үнгэржэ байгаа театральна хаһада тэдэнэр яһала амжалтатай гаража байна. Һэльбэн шэнэлэгдэһэн байшандаа ороһоор бэлдэжэ табиһан хэдэн зүжэгүүдые, үхибүүдтэ зорюулагдаһан зүжэгүүдые ба томо концерт наада гастрольдоо дэлгэхэ. Театрай уран һайханай хүтэлбэрилэгшэ Цырен-Доржо Бальжановай хэлэһээр, бүхы труппа, хамта дээрээ 50-60 хүн гастрольдо гараха.
– Забайкалиин хизаарай драмын театр соо (Шэтэ) Болот Ширабазаровай “Энэрил хайра” гэһэн зүжэгөөр гастролёо эхилхэбди. Залуу драматург, бэлигтэй классик Дашарабдан Батожабайн “Төөригдэһэн хуби заяан” гэһэн роман-трилогиин үргэлжэлэл болгожо, Аламжа Жалма хоёрой Булад хүбүүнэй саашанхи хуби заяа харуулжа бэшээ бэлэй. Энэ хаһада харагшадтамнай ехэтэ һайхашаагдаа. Уильям Шекспирэй “Комедия ошибок”, Монгол драматург Д. Мэндсайханай ”Эхэ”, Г. Башкуевай “Шүдэрлэгдэһэн зуун жэл”, Галсан Нанзатовай “Номгон Булат”, “Угаймни шэдитэ орон” гэһэн үльгэр-зүжэг болон бусад ажалнуудаа хүршэнэртөө абаашахабди. Мүн тиихэдэ театрай артистнарай хабаадалгатай томо концерт наада харагшадай үзэмжэдэ дэлгэхэ түсэбтэйбди, – гэжэ Цырендоржи Дондокович хөөрэнэ.
Мүн театр гастрольдо гарахадаа, үшөө нэгэ зорилго урдаа табинхай. Юуб гэхэдэ, Буряад театр үе болоод лэ буряад залуу хүбүүд, басагадые шэлэжэ, артистын дээдэ һургуулида эльгээжэ байдаг заншалтай юм.
– Мүнөө жэл Владивостогой урлалай дээдэ һургуулида Буряад театрай гурбадахи студи эльгээхэмнай. Би, Дамба-Дугар Бочиктоев, Олег Бабуев болон бусад түрүүшын студи дүүргээ бэлэйбди. Хоёрдохи студиин гансал Дабацу Юндунова хүдэлжэ байна, – гэжэ Цырендоржо Дондокович хөөрэбэ.
Театрай 5-6 жэл болоод лэ шэнэ артистнарые һургажа байгаагүй һаань, буряад хэлэн дээрэ наадаха артистнар дуталдажа, ажаябуулгамнай хохидохо бшуу.
– Урдандаа театрай хүтэлбэрилэгшэд Цырен Аюржанаевич Балбаров, Федор Семёнович Сахиров гэгшэд театрай мэргэжэлтэ буряад артистнарые һургаха гэжэ ехэ анхарал табидаг байгаа. Ерээдүйн халааниие бэлдэлгэ ехэ удха шанартай асуудал гэжэ һананаб. Газар уһан дээрэ ганса буряад театр гэжэ хэлсэдэг гээшэбди. Тиимэһээ бүхы буряад яһатанай ажаһуудаг газарнуудһаа бэлигтэй буряад хүбүүд, басагадые шэлэжэ, ехэ газарай һайн һургуули хүүлэхэдээ, стипенди түлэжэ, (һайн һурабал, тэндээ нэмэри стипенди абаха бшуу) ошохо, ерэхэ харгын мүнгэ түлэжэ, хамтын байрада байлгажа, 4 жэлэй туршада һургадаг заншалтайбди, – гэжэ Цырен-Доржо Дондокович тэмдэглэбэ.
Тиимэһээ түрэл театраймнай гастрольдоо ябахадаа эрхилхэ үшөө нэгэ ажалынь гэбэл залуу һүрэг – хүбүүд, басагад сооһоо Буряад театрай артист болохо һаналтай бэлигтэйшүүлые шэлэхэ. Тэдэ залуушуул Шэтэдэ болон Агада шэлэгдээд, түрүүшын дабаа дабабал, июниин хуушаар Улаан-Үдэдэ үнгэрхэ шэлэлгын түгэсхэлэй шалгалта гараха болоно.
Нэмэжэ хэлэбэл, дүрбэн жэлэй туршада һуража гараһан оюутад дээдэ һургуулияа дүүргэхэдээ, 3-4 дипломно зүжэг ба нэгэ томо концерт бэлдээд, театртаа асарха ёһотой.
Буряад театрай гастрольнууд апрелиин 3-һаа 15 хүрэтэр үнгэрхэ.
