Россиин арадай артист, М. Глинкын нэрэмжэтэ Бүхэсоюзна конкурсын лауреат Вячеслав Бальжинимаев Москвагай П. И. Чайковскийн нэрэмжэтэ гүрэнэй консерватори дүүргэһэн юм. 1977 ондо, оюутан ябахадаа, Ташкентдэ үнгэргэгдэһэн М. Глинкын нэрэмжэтэ вокалистнуудай конкурсдо хабаадажа, «Найдал» гэһэн шанда хүртөө. Зүгөөр хоёр жэл болоод, энэл конкурсдо дахяад хабаадажа, Буряадай оперо болон баледэй академическэ театрай залуу солист лауреадай нэрэ зэргэдэ хүртэһэн байна.
Тиин саашадаа, театрта хүдэлжэ эхилээд байхадаа, хоёр жэлэй туршада «Ла Скалада» бэлигээ мүлижэ, тэрэ Миланай театрай шэдитэ оршон байдалай үзэгдэл, мэдэрэл дуушанай зүрхэ сэдьхэлдэ мартагдашагүй сараа үлөөһэн гэхэ.
Вячеслав Дашинимаевич Бальжинимаев ирагуу һайхан тенор хоолойтой. Түрэл театртаа 30 гаран сольно партинуудые гүйсэдхөө. Тэдэнэй тоодо П. Чайковскийн «Иоланта» оперодо Водемоной, Д. Вердиин «Атиллада» Фореттын, М. Фроловой «Энхэ-Булад баатарта» Энхын роль, Д. Вердиин «Травиата» оперодо Альфредэй партинуудые гүйсэдхэһэн байна. Олон тоото рольнуудые наадажа, бүхэдэлхэйн болон ородой классическа найруулгануудые эрхим һайнаар гүйсэдхэжэ, харагшадай үндэр сэгнэлтэдэ хүртэһэн юм.
Дуушанай 65 наһанай ойн баяртань зорюулһан зохёохы үдэшэдэ
Соёл урлалай академиин профессор Вячеслав Бальжинимаевые дэмжэжэ хабаадаха дуушадые нэрлэбэл: одото айлшад – СССР-эй арадай артист Галина ШОЙДАГБАЕВА, Россиин габьяата артист Батор БУДАЕВ, Буряадай Гүрэнэй шагналтан Баиржаб ДАМБИЕВ гэгшэд мэдээжэ оперонуудһаа хэһэгүүдые, неаполетан болон Буряадай композиторнуудай дуунуудые гүйсэдхэхэ.
Концертдэ хоор болон Валерий Волчанецкийн хүтэлбэри доро Оперо болон баледэй театрай симфоническэ оркестр хабаадаха, тиихэдэ дуушанай бэлигтэй шабинар – Данзан Бальжинимаев, Бальжин-Нима Цыбенов, Галсан Ванданов, Владимир Бухаев, Александр Эрдынеев, Баяр Аранжуров, Серафима Хабитуева гэгшэд хабаадаха юм.
Концертмейстернуудынь Россиин арадай артист Дарима Линховоин, Елена Шайдурова, Елена Березовская.
Энэ үдэшые хүтэлэгшэ – Эдуард Жагбаев.
