Апрелиин гурбанhаа долоон болотор Шэтэ хотын театрай тайзан дээрэ найман зүжэг харуулжа, нэгэ дуутай, шогтой наада дэлгэбэ. Шэтэдэ буряад зон бүхы нютагуудhаа ажаhуудаг, үндэhэн хэлэн дээрээ ажалаа ябуулжа байдаг театрай ерэхэдэ эдэ үдэрнүүд тэдээндэ ёhотойл hайндэр боложо үнгэрбэ. Театрай танхим соо харагшад дүүрэн, наадажа байhан зүжэгшэдэй одо заяаниинь үргүү байгаа гэжэ анхармаар байба. Угтажа абагша талын айхабтар ехэ оролдосо арад зоной түрэл театртаа аhан ехэ дуратай байhые үшөө дахин гэршэлбэ.
Шэтэ хотын бишыхан харагшад ямар дуратайгаар хүлеэжэ абаба гээшэб, абажа ошоhон хоёр үльгэр-зүжэгүүдыемнай хаража hуунад юм гү, али манай зүжэгшэдтэй суг наадалсажа байгаа юм гү гэхээр байдал танхим соо анхармаар hэн. Эдэнь Болод Ширибазаровай «Волшебная страна предков», Евгений Шварцын «Голый король» гэhэн зүжэгүүд бэлэй.
Тэрэл Болод Ширибазаровай бэшэhэн «Энэрил хайра» гэжэ зүжэгөөр нүүдэл наадануудаа эхилээд, хойно хойноhоонь Галсан Нанзатовай «Номгон Булад», Дашзэвэгийн Мэндсайханай «Эхэ», Геннадий Башкуевай «Шүдэрлэгдэhэн зуун жэл», Цырен Шагжинай «Будамшуу», тиихэдэ хоёр жэлэй саана Ленинградай театрай Дээдэ hургуули дүүргэжэ ерэhээр ажаллажа байhан залуу зүжэгшэдэймнай табиhан «Комедия ошибок» гэhэн зүжэгүүд Шэтын харагшадта ехэл дуратайгаар хүлеэгдэн абтаа.
Апрелиин найманhаа арбан табан болотор Агын Буряадай тойрогой гурбан аймагуудай харагшадтай эльгэн дулаахан уулзалганууд үнгэрөө. Ошоhон зүжэгшэдэймнай дунда тойрогhоо гарбалтай Зоригто Ринчинов, Болод Динганорбоев, Оюуна Тудупова, Зоригто Цыбендоржиев гэгшэд байгаа, нютагайхидынь тон дуратайгаар угтажа абаа гэжэ тэмдэглэхэ хэрэгтэй.
Энэ нүүдэл наадануудтаа гараhан ябадалаймнай эгээл hонирхолтой ушар юуб гэбэл, арад зондоо саг үргэлжэ хүлеэгдэжэ байдаг томо артистнарнай ябалсаа. Театрай ябаhан лэ газарта «Лариса Егорова ерээ гү?, Михаил Елбонов ерээ гү?» – гэжэ асуужал байдаг зон энэ удаа Россиин арадай артистнар Лариса Егорова, Михаил Елбонов, Марта Зориктуева – томошуулаймнай бүхэли баглаа хаража, бэлитэнь хүртэхэ азатай байгаа бшуу. Хүн зомнай эдэ зүжэгшэдөө яаhаншье дуратайгаар хүлеэжэ, угтажа абадаг юм гээшэб, бэлигэй далайн хизааргүй гээшэ одоол үзэгдэнэ даа…
Иимэ дулаахан уулзалгануудай үедэ энэ жэлэй июнь соо Алас-Дурнын театрай Дээдэ hургуулида манай театрhаа эльгээхэ залуушуултай уулзалганууд, хөөрэлдөөнүүд үнгэрөө. Агын тойрогой аймагуудай hургуулинуудые (Согто-Хангилай, Амидхаашын болон бусад) энэ жэлдэ дүүргэжэ байгшад зүжэгшын мэргэжэл шэлэхэ дуратай байhанаа мэдүүлээ. Усть-Ордагай тойрогой, Буряадай аймагуудай залуушуултай суг эдэшье эдиршүүл аза туршахаяа ерэхэ байха, энэ жэл Дээдэ hургуулида оройдоол арбан табан хүниие эдээн сооhоо шэлэжэ абаха ёhотой юм.
Уулзалгын үедэ зүрхэтэй, шанга хоолойтой нэгэ басаган манай найруулагшын:
– Юундэ ерээбши? – гэжэ асуухада:
– Артист болохо гэжэ шиидээд ерээб, – гэбэ. Тиихэдэнь найруулагша:
– Дуу дуула! – гэбэ. Тэрэ басаган урдаhаань:
– Би дуулажа шададаггүйб! – гэжэ тодорхой шангаар харюусаба.
– Тиихэдээ, дуулажа шадахагүй аад, юундэ ерэhэн болонош? – гэхэдэнь:
– Би дуу дууладаггүй түрүүшын артист болохоб! – гэжэ тоб байса харюусаад, нүгэлгүй сэлмэг нюдөөрөө энеэбхилэн хараад байба ха юм…
Драмын театрай зүжэгшэд бултадаа дуушадшье бэшэл даа, бэлигэй шэглэлнүүд элдэб янза байдаг, тиимэhээ дуушье дууладаггүй эрхим зүжэгшэд биил ха юм, үшөө ургахадаашье ургана ааб даа. Тиигэхэнь лэ болтогой!
