Тус клип “Мир-Бурятия” сэнхир дэлгэсэй «Энхэ тайбан Буряадни» гэһэн дамжуулгада эхин түрүүлэн харуулагдаа. Клип соо Буряадай Гүрэнэй Хоца Намсараевай нэрэмжэтэ академическэ драмын театрай залуу артистнар Ольга Ранжилова Зоригто Цыбендоржиев хоёр наадажа, үзэмжэтэй гоё болгон шэмэглэһэн байна.
“Жараад оной хуушаар энэ дуун бэшэгдэһэн байха ёһотой, түрүүшынхиеэ Дугаржаб Дашиев дуулаһан байха гэжэ һананаб, – гээд хүгжэм зохёогшо Базыр Цырендашиев хөөрэнэ. “Дондог бидэ хоёр хэлэхэеэ һанаһан бүхы юумэеэ энэ дуун соо хэлээбди, дуунай шүлэгынь гүнзэгы бодолтой, философско удхатай гэжэ һанагшаб. Буряадһаа ородто оршуулхада шүлэгүүдые ехэл бэрхэ, удхань буруушаг болошодог юм даа”.
Клип бүтээгшэд: найруулагша – Баярмаа Жалцанова, оператор, эблүүлэгшэ – Александр Захаров.
Г. Цыдынжаповай нэрэмжэтэ Буряадай гүрэнэй оперо болон баледэй академическа театрай дуушад Ольга Жигмитова, Аюна Базаргуруева хоёрой Буряад Республикын соёлой яаманай дэмжэлгээр «2009-2014 онуудта буряад хэлэ хэбээрнь үлээхэ болон саашадань хүгжөөхэ» гэһэн Гүрэнэй түлэбөөр хоёр клип бүтэһэн байна гээд һануулая.
Бодол
Урихан тэрэ басагантай
Уулзаашгүй һаа дээрэл һэн.
Уулзаһан тэрэ үдэрһөө
Ухаан минии балартаа.
Сэлгеэхэн тэрэ үдэшэлэн
Сэнгээшгүй һаа дээрэл һэн.
Сэнгүүхэн тэрэ үдэшэнһөө
Сэдьхэл минии буруутаа.
