Энэ жэлһээ наһан үеэрээ нэрлэжэ ябаһан Сурхарбаанаймнай нэрэнь һэлгэгдэжэ, бүхы монгол хэлэтэ арадуудай нэрлэдэгээр «Наадан» гэһэн нэрэтэй болгогдоо, даб дээрээ «Наадан-Сурхарбаан» гэжэ нэрлээд Буряадай дуун болон хатарай «Байгал» гэһэн үндэһэн театрай эмхидхэлгээр республикымнай соёл болон урлалай, тамирай (Эрын гурбан наадан) түлөөлэгшэд дүрбэн зүг найман хизаарһаа Нааданай талмайда сугларха байна. Тиигэжэ энэ жэлэй дүрбэн тэгшэ Наадан наярха.
Гадна манай Нааданда Монгол ороной мэдээжэ поп-дуушан Дээгийн Дэлгэрмөрөн хабаадажа, уянгата һайхан дуунуудаа үдэшын нааданда бэлэглэхэ. Энэ дуушан тухай хоёр үгөөр хэлэхэ болоо һаа «Номин Талст» хамталигта эгээл үндэһэн маягаа баримталан, гайхамаар гоёор дууладаг уянгата дуушан гэмээр юм. 1995 онһоо дуулажа эхилһэн дуушанай мүнөө хэһэн ажалыень тоолохо болобол – 14 CD диск, 15 тоглолто. Азиин 16-дахи Олимпиин Ехэ наадамда монгол туургатанаа түлөөлжэ дуулаһан шэлдэг дуушан юм.
Һүүлшын хэды жэлнүүд соо Д. Дэлгэрмөрөн болобол Монгол оронойнгоо аялга дуунуудые хүршэ Хитад орондоо дэлгэрүүлжэ, тэндэ амжалтатай урагшатай уран бүтээлээ ябуулжа байдаг хүн байба. «Намайе түрэл орондоо урбаһан ябадал гаргана гэжэ хэлэһэнэй, бодоһонойшье хэрэггүй, би уран бүтээлээл Хитад руу дэлгэрүүлжэ байнаб. Монголдо ородоор дуулаашадые урбаһан зон гэдэггүй ха юм. Энэ болобол урлаг гээшэ гэжэ бү мартаарайт», – гэжэ Д. Дэлгэрмөрөн өөрөө хэлэһэн байдаг.
Энэ болон бусад үзэсхэлэнтэ үзэгдэлнүүдээр һонирхохоёо наадан тээшээ шамдаял даа, хүндэтэ нүхэд!
http://www.youtube.com/watch?v=8OEpS4ci0WE&feature=related
http://www.youtube.com/watch?v=hG7p9hsoCLc
http://www.youtube.com/watch?v=5_F7qEis3Lc
http://www.youtube.com/watch?v=ae5MiEiBYI8
