Дуу дууладаг, хатар наададаг бэлигтэй хүүгэдэй дунда шэнэ нэрэнүүд одото тэнгэридэ ялалзаба гээд абаһаар хэлэжэ болохо.
Энэ мүрысөөнэй онсо талануудай нэгэдэхинь гэхэдэ, мэргэжэлтэ жюриин гэшүүд мүрысөөндэ хабаадагша хүүгэдтэй өөрынгөө һанамжа, шүүмжэлгэнүүдээрээ тэрэ дороо хубаалдажа байгаа. Ямар юумэниинь һайн бэ, юун үшөө дутанаб, саашадаа ямар юумэн дээрэ хүдэлхэб гэхэһээ эхилээд, олон-олон тон анхархаар юумэ нэрэтэй шүүгшэдһээ шагнажа абаха гээшэ тон үнэтэй зүй гээд тэмдэглэе. Хоёрдохёор, бүхы үнгэрһэн шатануудые бултыень “Мир-Бурятия” телевидени өөрынгөө канал дээрэ харуулжа байба. Энэнь баһал аргагүй сэнтэй, юуб гэбэл, мүрысөөндэ ошожо шадаагүй хүн зон энэ үнгэрһэн үйлэ хэрэгээр маша ехээр һонирхон, гэртээ хаража, урилдаанда ороһон хүүгэдые олон зон таниха, мэдэхэ болоно.
Тиихэдэ энэ мүрысөөн тухай оройдоол һара үлүүтэйхэн урид соносхогдожо, энэ урилдаанда ороһон хүүгэд шэнэ-шэнэ номернуудые зорюута энэ конкурсда бэлдэжэ үрдеэгүй гэжэ харахада эли байгаа. Нүгөө жэл эртээнһээ энэ мүрысөөндэ бэлдэжэ, hайхан дуу, хатарнуудые шэлэжэ, бэлдэхэлэй ажал ябуулжа эхилхэ хэрэгтэй гээд анхарагдаа.
Харин энэ “Гэгээн аласай ододой” илагшадай тоодо орожо шадаагүй хүүгэд бү гомдогты, юуб гэбэл, мүрысөөн гэдэг юумэн бишыханш, томош хүнэй ажамидаралда заатагүй байха ёһотой, юумэн гээшэ нэгэл мүрысөөгөөр дууһадаггүй. Юуш хада таанар мүрысөөндэ орожо, зүрхэтэй, зоригтой байһанаа харуулаат: айнгүйгөөр тайзан дээрэ гаража, өөрыгөө олондо мэдээжэ болгоот, бэлиг абьяасаа харагшадтаа бэлэглээд, дутуу дундануудаа мэдэжэ абаат... Тиигээдшье, саашаа багшанартаяа һайн гэдэг ажаллаад, шэнэ һайхан дуу, хатартай болоод, нүгөө жэлэй урилдаанда орохо аргатайт. Тиимэ бэшэ гү?
Монгол Улсын габьяата зүжэгшэн, хоридугаар зуунай манлай дуушан, Улаан-Баатар хотодо үнгэрдэг мүрысөөнэй юрэнхы шүүгшэ – жюриин түрүүлэгшэ, олониитэдэ мэдээжэ Батамүнхын Сарантуяа зорюута «Гэгээн аласай одод» мүрысөө харахаяа Буряад Республика ерэжэ, Монгол руу ошохо зургаан габьяатаниие тодоруулһан байна. «Гэгээн аласай одод-2013» гэһэн урилдаанай Улаан-Баатар хотодо үнгэрхэ хубида – Уласхоорондын хэмжээндэ хэд тэмсэхэ болооб гэхэдэ:
Хатар нааданай «Очарование» ансамбль «Дүрбэн хотохон» гэһэн хатар харуулжа, жюриин, тэрэ тоодо «Гэгээн аласай одод» гэhэн урилдаанай гол шүүгшэ Батамүнхын Сарантуяагай һайшаалда хүртэн, Улаанбаатар лаб ошохо болобо. Гадна тэдэнэр Улаан-Үдэдэ болоһон тэмсээндэ шалгаржа, хоёрдохи һуурида гараа.
Дуу гүйсэдхэдэг «Жаворонок» ансамбль шангай һуури эзэлээшьегүй һаа, Сарантуяагай нарин утаһа дайраһан байжа, Монгол ошохо 6 азатанай тоодо оролсобо. Баhа иимэл аргаар Роман Шаренда «Попурри» дуунуудаа дуулахаяа, Улаан-Баатар зүглэхэнь. «Девочка-весна» гэжэ дуу дуулаһан Милана Мясникова 11-тэй, Улаан-Үдын хүүгэдэй урлалай 13-дахи һургуулиин шаби.
Тиихэдэ Оюун-Эрдэни Дамбаева Хэжэнгын аймагай Үлзытэ нютагһаа зорюута ерэжэ, «Гэгээн аласай одод» гэhэн мүрысөөндэ хабаадаа. Тэрэ оройдоол юһэтэйхэн. Харагшадай шагналда хүртэһэн энэ басагахан мүн лэ Монголдо мүрысөөгөө үргэлжэлүүлхэ.
Хүндэтэ үхибүүд! Аза талаан гээшэ адли тэгшэ хүн бүхэндэ хүртэдэг бэшэ ха юм даа, мүнөө хабаадажа, ухаантай болоод, ээлжээтэ мүрысөөнүүдтэ заатагүй илахал байхабди гэhэн этигэлтэй, голхорол үгы үлыт даа. Улаан-Баатар хото ошохо хүүгэд эхэ оронойнгоо нэрэ hүлдые үргэжэ, түрэл Буряадаа хариин газар түлөөлжэ, урагшатай, амжалтатай ябажа ерэгты. Соёл урлалай замаар ерээдүйгөө шэлэхэ болоо hаа, энэмнай одоол хүшэрхэн, тон ехэ харюусалгатай мэргэжэл гээшэ гэжэ мүнөөнhөө ойлгохо шухала, энэ хэрэгтэ багшанарай, түрэлхидэй үүргэ ехэ байха ёhотой.
Даб дээрээ энэ мүрысөө туйлажа гарахадамнай туhа үзүүлhэн бүхы хүнүүдтэ, багшанар болон түрэлхидтэ эмхидхэгшэдэй зүгhөө баяр хүргэнэбди! Юуб гэхэдэ энэнмнай «Очарование» ансамблиин хүтэлбэрилэгшэд Г. П. Верцхайдер, С. В. Цветкова, «Жаворонок» ансамблиие ударидадаг В. М. Галактионова, багшанар Л. Г. Лавренова, Б. Б. Тудупова гэгшэдэй оролдолгын ашаар туйлагдаhан амжалтанууд гээшэ.
