Энэ ушараар республикымнай заншалта һайндэр Сурхарбаан гурбан үдэрэй туршада наярха гэжэ бэлэдхэлэй хүдэлмэринүүд ябажа байнхай. Онсолон хэлэхэдэ майн 30-най үдэр тамирай мүрысөөнүүд, үдэшэлэн, 18 саг 30 минуутаһаа Хоца Намсараевай нэрэмжэтэ академическэ театрта һайндэрэй ехэ концерт болохо. Майн 31-дэ хотын тамирай түб талмай дээрэ тамирай наадануудай түгэсхэлэй шатанууд, Наада нээлгын баяр, уран бэлигтэнэй ехэ концерт үнгэрхэ. Удаань, зургаан һарын нэгэндэ республикын аймагуудай харалганууд үргэнөөр дэлгэгдэхэ.
Эндэ онсолжо хэлэхэ нэгэ юумэ бии гэбэл, бүхы монгол хэлэтэ арад түмэн зунайнгаа заншалта һайндэрые Наадам (Наадан) гэжэ нэрлэдэг, эрын гурбан наадые багтааһан энэ ехэ нааданай гансал һур харбалгаар нэрлэгдэһэн ушар халта таагүй ха гэһэн бодолтой, манайшье республика энээнһээ хойшо заншалта энэ һайндэрөө Наадан гэжэ нэрлэхэ гэһэн шиидхэбэри абанхай. Тиихэдээ, даб дээрээ, дадал болотор, Наадан-Сурхарбаан гээд байг лэ даа гэгдэһэн байгаа. Иимэ ушарай тохёолдоод байхада энэ Нааданаймнай һүлдэ дуун-гимн хэрэгтэй болобо ха юм даа. Тиимэ дууншье бии болоо. Буряадай дуун болон хатарай «Байгал» гэһэн үндэһэн театрай хүгжэмэй талаар мэргэжэлтэн Павел Кареловай Николай Шабаевай үгэнүүд дээрэ бэшэһэн «Дүрбэн тэгшэ наадан» гэһэн дуунай нара харалга (орой, наранай ороһон хойно) майн 30-да болохо. Юундэ дүрбэн тэгшэ наадан юм гэбэл, эрын гурбан нааданай хажуугаар наада-зугаагаа дали дээрээ үргэжэ гарадаг уран бэлигтэнэймнай дуу, бүжэг бэлэй гэжэл энэ һүлдэ дуунай үгэнүүд соо оруулагдаһан байха. Һүрөөтэй, жабхалантай энэ дууе «Байгал» театр гүйсэдхэнэ. Доро шэнэ дуунай үгэнүүдые дурадханабди:
ДҮРБЭН ТЭГШЭ НААДАН
Хүгжэмынь Павел Кареловай
Үгэнүүдынь Николай Шабаевай
Аяар урда галабһаа
Алдар солоор бадарһан
Агуу Наадан-Сурхарбаан –
Арад зоной Наадан!
Мүнгэн жолоо хүндэтэй
Морин сайхан эрдэни –
Эмниг агты түбэргөөд,
Эрын гурбан Наадан!
Дорюун зоной үргэһэн,
Дайдаар дүүрэн дэлгэрһэн
Согтой Наадан-Сурхарбаан –
Солоор үндэр Наадан!
Мэргэн һуршын алдары
Мянган жэлдэ дуудажа,
Зэбын дуугаар дуулаһан
Эрын гурбан Наадан!
Буурай холын түүхэтэй
Буряад-монгол заншалтай
Золтой Наадан-Сурхарбаан –
Зоной баяр Наадан!
Бүргэд хатар дэлгэһэн
Барилдаашын солые
Эгээл дээгүүр дуудаһан
Эрын гурбан Наадан!
Хамаг зонии хандуулһан
Хатар, ёохор, дуунуудтай,
Хүхюу Наадан-Сурхарбаан –
Хүгтэй зоной Наадан!
Аймаг, айлаар дэлгэржэ,
Агууехэ найрамдал
Дэлхэй дүүрэн мүнхэлһэн
Дүрбэн тэгшэ Наадан!
Наадан-Сурхарбаан!
Наадан тээшээ шамдыт даа, хүндэтэ нүхэд!
