Мүнөө жэл республика дотор ТОС-уудай хоорондо үнгэргэгдэһэн конкурсын дүнгүүд элирүүлэгдээд, Шэбэртэ нютагай дүрбэн ТОС-ууд гүрэнэй мүнгэн тэдхэмжэдэ хүртөө. Тэдэнэй тоодо “Ая-гангын орон” ТОС-ойхид 80 мянганай шанда хүртэбэ, мүн “Единая Россия” партиин хүтэлбэрилэгшэ Владимир Павловай оролдолгоор 20 мянган тухэриг музейн барилгада һомологдоо. ТОС-ойхид үнгэрэгшэ жэлдэ 136 мянган түхэриг музейн барилгада гаргашалаа. Нютагайхидай хүсөөр барилга үргэлжэлүүлэгдэһээр. Зүгөөр хүдөө нютагайхидта хаанаhаа тиимэ ехэ мүнгэн зөөри байхаб даа? Гүрэн түрын үгэһэн мүнгэ арьбадхаха зорилготой энэ концерт наада эмхидхэгдэбэ. Ниитэ хүдэлөөнэй түрүүлэгшэ Светлана Улзытуева-Банзаракцаевагай үүсхэлые буряадай бэлигтэй дууша бүлэ Зоригто ба Нонна Тогочиевтан халуунаар дэмжэжэ, энэ нигүүлэсхы удхатай хэмжээ ябуулгые бэлдэжэ байна. Энэ концертын ашаар олдогдоһон мүнгэн зөөри Дондог Улзытуевай, Цырен-Дондог Хамаевай болон нютагайнгаа уран зохёолшод, журналистнууд болон бүхыдөө нютагай түүхэдэ мүр сараа үлээһэн алдарта зондо зорюулагдаһан музейн барилгада гаргашалагдаха юм.
Энэ нангин хэрэг мүнөө жэл Үлзытын Дондогой эжын нангин дурасхаалай үдэр – августын 20-до болохо музей-буусын нээлгэндэ бэлдэгдэнэ.
Энэ музей-усадьбын комплекс соо, музейһээ гадна, зунай сагта 100-гаад харагшадые нэгэ доро багтааха хэмжүүртэй нээмэл тайзан тогтоогдохо. Холын айлшадые угтажа амаруулха 4 оротой зошод буудал нээгдэхэ. Үлзытын Дондогой тоонто дээрэ Шэбэртын 5 хүбүүдэй нэрэнүүдые мүнхэлһэн “Нүхэдэй Сайн гэр” нээхээр түсэблэгдэһэн гэнэ. Хүүгэдэй наадаха талмайхан заабол байгуулагдаха, наһатайшуулдаа шадал зэргээрээ туһа хүргэхэ ажал хэгдэхэ.
Нигүүлэсхы сэдьхэлэй концерт-нааданда Дондок Улзытуевай ба Цырен-Дондог Хамаевай зохёоһон дуунуудта дуратайшуул, тоонто нютагайнгаа түүхээр омогорходог хүбүүд басагад, олон үеын зон суглархаар хараалагдана. Мүн Дондог Улзытуевай шүлэгүүдэй ба прозын гол геройнууд уригдаһан байна. Энэ нааданда ехэ олон һонирхолтой үйлэ хэрэгүүд болохоор хараалагдана.
Байгша оной июниин 12-ой үдэшын 6 сагта үнгэрхэ концерт-нааданда ерэжэ, “Буряадай Пушкин” гэжэ нэрэшэһэн бэлигтэй нютаг хүбүүгээ дэмжэхыетнай уринабди.
