Тусхайлан хэлэбэл 16-най үдэр 10 сагһаа Маарагтын адагта оршоһон Уянгын сэсэрлиг соо Уран шүлэгэй хүрдэ нээлгын баяр болохо. Энэ ажалые Буряад Республикын арадай зурааша Юрий Мандаганов эрхилжэ энэ үдэрнүүтэ энэ хүрдэ бүтээлгын ажал ябажа байна гээд тэмдэглэе.
Тиихэдэ уран уншалгаар мүрысөөнүүд болохо гэжэ соносхогдоод байна. Эндэ шүлэгүүдые уран гоёор уншаха, гүн удхатай магтаалнуудые, юрөөлнүүдые хэлэхэ аргатай, дуратайшье зон хабаадаха аргатай. Энэ хэмжээ ябуулга Маарагтын Нимбуу Боршогор гэһэн газарта Отошо Бурханай уншалгын һүүлдэ үнгэрхэ гээд мэдүүлэе.
«Юрөөл» гэжэ үгэдөө тайлбари үгэхэ болобол иимэ байна: Хамбатан Дамба Аюшеев «үреэл» гэжэ буруу хэлэгдэнэ, «юрөөл» гээд хэлэгдэхэ ёһотой гэжэ нэгэтэ айладаа бэлэй. Энээн тухай ондоо тээ хэлэхэ газар олдоогүй, гэбэшье Хамбатанай айладаһаар «Юрөөл гэжэ оройдоол гансахан үгэ бии юм» гээшэнь зүйтэй ха гэжэ сурбалжалагшад хоорондоо зүбшөө бэлэй. Бидэ амиды бүгэдэдэ зорюулгые «үреэл», ошоһон бүгэдэдэ зорюулгые «юрөөл» гэдэг бэлэйбди. Тиигээд байхадань саашадаа «Амидын юрөөл», «Хойтын юрөөл» гээд энэ «юрөөл» гэжэ үгэеэ хэрэглэжэ байбал хайшаа юм, үргэн оломнай ямар бодолтой байдаг юм ааб, һанамжануудаа энэ мэдээсэлэй доро бэшэхэ байгаат гэһэн дурадхал байна.
Ивалгын болон Эгэтын дасангуудай ламанарай Отошо бурханай ехэ уншалгын үедэ болохо Намжил Нимбуевай энэ хэмжээ ябуулгада хабаадалсахыетнай уринабди.
