Богонихон наһандаа гүнзэгы удхатай хурса үгэеэ хэлэжэ үрдиһэн уран шүлэгшын дурасхаалда Яруунын аймагай Маарагтын адагта тэрэнэйл шүлэгөөр эхиеэ табиһан Уянгын сэсэрлиг аймагһаа гарбалтай, арад зондоо мэдээжэ уран шүлэгшэдэй нэрэнүүдые мүнхэлһэн бүхэли ехэ саад боложо тодоронхой. Эгээл эндэ хажуу бүридөө Намжил Нимбуевай богонихон шүлэгүүдые багтааһан зургаан хажуутай Уран шүлэгэй хүрдэ тодхоогдожо, энэ һарын 16-да, элинсэгүүдэйнь тоонто шадар бодхоогдожо арамнайлагдаһан Отошын субаргын ехэ уншалгын үдэр, тэрэнэй нээлгын баяр ёһолол үнгэрбэ.
Энэ юрын хүрдэ бэшэ. Доодо таладань мааниин хүрдэ тодхоогдонхой. Айхабтар удхатай энэ ехэ бүтээлые Буряадаймнай мэдээжэ, Россиин габьяата уран зурааша Юрий Мандаганов зохёон байгуулаа. Намжил Нимбуев гэжэ оройдоошье дуулаагүй хүнүүдэй уншаад лэ ойлгохоор нэгэ юумэ эндэ бүтээмээр байна гэһэн бодол Уянгын шүрэдэ ерээд байхадаа тархидамни ороһон байгаа гэжэ мэдүүлбэ. Бүтээлэйнгээ гаргашые (бага бэшэ гэжэ ойлгосотой) өөр дээрээ даажа абаад, хүрдэ дээрэ бэшээтэй шүлэгүүдэй үзэг бүхэниие Олег Сизых Роман Номоконов хоёр туһалагшадтайгаа нэгэ нэгээр бүтээжэ, хүрдын зургаан хажуунуудта гагнажа хоноогоо, нара һалхинһаа хубиржа унашахагүй будагаар шэрдээ. Хамта 499 үзэг тэдэ шүлэгүүдтэнь ороһон байна.
Энэ хэрэгтэ, тиихэдэ уран уншагшадай мүрысөөнүүдые үнгэргэхэ хэрэгтэ Яруунын аймагай захиргаан (толгойлогшо Ц. Б. Шагдаров), Гүрэнэй Дүүмын депутат Михаил Викторович Слипенчук гэгшэд эбээн тэдхэлгын туһаламжа үзүүлээ, поэдэй эгэшэ Любовь Ширабовна Базарова иимэ ехэ удхатай бүтээл бүтээһэн, тэрэниие байха газартань тодхоһон, Намжилай 65 жэлэй ойдо дашарамдуулагдаһан хэмжээ ябуулгануудые эмхидхэн үнгэргэлсэһэн бүхы хүнүүдтэ айхабтар ехэ баяртай байһанаа гэр бүлынгөө зүгһөө мэдүүлбэ.
Эгэтын-Адагай дунда һургуули жэл бүри Намжил Нимбуевай түрэһэн үдэртэ зорюулжа «Нимбуевай уншалгануудые» үнгэргэдэг, энь заншал болонхой юм. Мүнөөшье Нарһатын, Иисэнгын, Үльдэргын, Хориин болон Улаан-Үдэ хотын һургуулинуудай һурагшад эдэбхитэй сугларжа, уран уншалгаар мүрысөөнүүдтэ хабаадалсаа. Энэ хэмжээ ябуулгые шүүхэ бүлэгтэ мэдээжэ хүнүүд оролсоо гэбэл Россиин габьяата артист Дарима Сангажапова, Светлана Балдандоржиева, тиихэдэ жюриин түрүүлэгшээр поэдэй дүү Баяр Нимбуев һууһан байха юм.
Уран бүтээл байгуулха харэгтээ шэнэ шэглэл һанажа, түрэл Буряад ороноо дэлхэй дээгүүр нэрыень үргэн суурхуулжа байһан уран зурааша Юрий Мандагановта зохёохы ехэ амжалтануудые хүсэел даа!
