Энэ hарын зургаанда Мухар-Шэбэрэй Харгааhата тосхон зунайнгаа заншалта Наадые нютагайнгаа нэрэ үргэжэ ябаhан, республикын Гүрэнэй сэнхир дэлгэстэ бэлигтэй диктор, журналист ябаhан, уран зохёолшо Зэгбэ Гомбожабайн гэрэлтэ дурасхаалда зорюулба. Иигэжэ жэл бүриингөө Наадые үндэр нэрэтэй хэн нэгэндээ зорюулжа байха шиидхэбэри абанхай, Галтай, Харгааhата, Хушуун-Үзүүр тосхонууд сугларжа найрладаг байха гэhэн шиидхэбэри нютагайхид абанхай. Ерэхэ жэлэйнгээ Наадые үндэр наhатай уран зохёолшо Гунгаа Гомбоевич Чимитовэйнгээ нэрэмжэтэ баяр болгожо сугларха юм байха.
Зэгбэ Гомбожабай. Энэ нэрые манай республика дотор дуулаагүй, тэрэниие мэдэхэгүй хүн гэжэ хомор байха, бүхы наhаяа Буряадай телевидениин хүгжэлтэдэ зорюулhан, республикын соёлой хүгжэлтэдэ горитойхон хубитаяа оруулhан хүн бэлэй даа. Мүнөө Зэгбэ Дамбаевичай ударидалга доро телевидениин хорёо соо нэгэтэл бии болоhоор, энэ үдэр хүрэтэр аха нүхэрэйнгөө хэжэ, бүтээжэ ябаhан хэрэгые үргэлжэлүүлэн, олон тоото залуу журналистнар ажаллажа байдаг, тэдэ зоной наhанайнь энэ хүндэшье, хүндэтэйшье харгые залажа, заажа үгэhэн Зэгбэ Гомбожабай тэдээндээ гансаханшье үдэр мартагдадаггүй, мүнхэрөөшье hаа, үшөөл замайнь залуур зандаа үлэнхэй. Тиимэл байха ёhотой ха юм даа, хэн нэгэнэй эхилhэн hайн хэрэгые заал hаа саашадань үргэлжэлүүлхэ нүгөөдэ нэгэниинь байдаг ха юм. Энэл даа сагай хүрдын мүнхэ эрьесэ.
Нютагайнгаа эрхим хүбүүдэй нэгэн болохо Зэгбэ Гомбожабайн гэрэлтэ дурасхаалые мүнхэлжэ нютагай зон гарта хүлтөөрөө бодоо, эрхилhэн энэ хэрэгынь эрхим hайнаар бүтэбэ hэн. Тэдэ зониие, заримыеньшье hаа, нэрлэнгүй яажа болохоб: Буряад ороноо газар дайдаар суурхуулhан абарга Илья Санжиевич Гармаев, Дотоодын хэрэгүүдэй албанай ветеран Баясхалан Жамсуевич Дугаржапов, нютагай захиргаанай толгойлогшо Бадма Батомункуевич Бадмаев, Валерий Батомункуевич Цыбиков, Жаргал Дамбиевич Иванов, hургуулиин захирал Бимба-Цырен Валерьевич Очиров, хүдөө ажахын хүтэлбэрилэгшэ Базаржап Чимитцыренович Гомбоев, Нина Гомбожаповна Содномова, Улаан-Үдэ хотоhоо Цырегма Цыбиковна Дашинимаева, Светлана Николаевна Шангина болон бусад, Зэгбэ Гомбожабайн нютагайхид болон түрэл хамаатадынь олон зон хамтаржа, энэ Нааданай гаргашануудые даажа абаа бшуу даа.
Гаргашагүй ямар Наадан байхаб? Эндэ олон шэгнүүртэ барилдаагаар, хүл болон гар бүмбэгөөр, ута, богони зайнуудта урилдаагаар мүрысөөнүүд медальнууд болон дипломуудые барюулгатайгаар үнгэрөө, Харгааhата болон тойронхи нютагуудай уран hайханай бүлгэмүүд концерт-наадануудые дэлгээ, юрэдөө тэрэ үдэр эндэ сугларhан хүн бүхэнэй шэхэ баясуулжа, нюдэ хужарлуулха hонирхолтой хэмжээ ябуулганууд үнгэрбэл даа.
Зэгбэ Гомбожабай нютагаа шэнэлжэ ошобошье, тэрэнэй сагаан сдьхэл, номгон, нарин-нанжан абари зан үри бэеэрээ дамжан, маанар соогоо үлэнхэй. Хоёр хүбүүд эсэгынгээ нангин нэрые гамтайхан сахижа, дээрэ үргэжэ ябадаг юм. Жаргал Гомбожапов ажалайнгаа намтарые эхилхэдээ нэгэтэл шэлэhэн мэргэжэлээрээ, тэрэл сэнхир дэлгэстээ абынгаа хэрэг үргэлжэлүүлэн, нүхэд зондоо хүндэтэй ябадаг. Энхэ Гомбожапов дээдэ гарай хирург мэргэжэлтэн, харахадашье тон лэ эсэсгэ мэтэ нарин, сэбэр, харюусалга ехэтэй ажалдаа мүн лэ дээгүүр нэрлүүлжэ, республикын габьяата эмшэн гэhэн нэрэ зэргэтэй. Хоёр хүбүүд абынгаа нэрые нэрлүүлэн үргэлжэлүүлхэ ухаантай бэрхэ хүүгэдтэй. Үбгэн абын үнсэжэ, хаража баясаагүй алтандал эдээхэн ашанараа наhанайнь нүхэр, мүн лэ Буряадай телерадиокомпаниин ветеран Будаали Дашеевна үргэлсэн харалсажа hууна.
Тиимэл ха юм даа ганса наhанай табисуур гээшэ. Жаргалтайл хүнүүд хойноhоошни дурсажа, нэрлэжэ байха үнэн сэхэ нүхэдтэй, үри бэетэй байдаг байха.
Зураг дээрэ Нааданай үедэ
