Саг хубилжа, Буряад дайдаарнай бурхан шажан дахинаа эршэеэ абан шэнээр дэлгэржэ, арад зомнай сүлөөтэй һүзэглэхэ, гунигаа арилгажа, сэдьхэлээ тэгшэлхэ аргатай болоһоор олоншье жэл болоогүйл даа. Энээхэн үе соо гү, али хэдэхэн жэлнүүдэй туршада хаа-яагүй газар дэлхэйн нюрууһаа һууритаяа хамагдажа һүнөөгдэһэн дасангууд шэнээр баригдажа, толорон тодороо.
«Монгол Уласай 21 аймагта, ниислэл Улаанбаатар хотодо, Буряад ороной ниислэл Улаан-Үдэдэ бадарһан Бүхэдэлхэйн монголшуудай нангин гал Буряад ороной нютагуудһаа түрүүлэн суута, домог түүхэтэ Түгнын талада мүнөөдэр бууба» – гэжэ марафон хүтэлэгшэ Жанна Дымчикова соносхобо.
Улаанбаатар хотодо Монгол туургатаниие нэгэдүүлһэн «Хамаг Монгол» гэһэн нэрэтэй хүндэдхэлэй наадан 2013 оной март һарада үндэр хэмжээндэ үнгэрөө бэлэй. Энэ проектые Монгол Уласай Соёлой габьяата зүжэгшэн, мэдээжэ дуушан Самандын Жавхлан үүсхэн зохёожо, Хальмагай, Тывагай, Буряад Республикын, Үбэр Монголой үзүүр дуушадые урижа, эды ехэ ажал эмхидхээ.
«Сасаһан шагай мэтэ бутарһан саг нэгэн байбашье, адхаһан альган мэтэ нэгэдэхэ саг ерэбэ. Хамаг Монгол, нэгэдэе!» – гэһэн уряа доро Дэлхэй даяар дүүрэн таража амидаржа байһан монгол туургата арадууд хэлэеэ, түүхэеэ, ёһо заншалаа мартангүй, эб нэгэн боложо, ерээдүй үетэндөө дамжуулха ёһотойбди. Энэ үйлэ хэрэг Буряад орондомнай 7 һарын 14-дэ үнгэржэ, нүүдэлшэ арадай дуу хүгжэм зэдэлүүлжэ, гарай табан хурган шэнги табан эрхим дуушад таба мянган буряад-монголшуудай сэдьхэл зүрхые ханааһан байна.
Энэ ехэ концерт үнгэргөөд, Буряад ороноймнай суута дасангуудай нэгэн болохо, домогоороо баян, түүхээрээ гүнзэгы Суулгын дасаниие һэргээхэ хэмжээ ябуулгада дуушад Самандын Жавхлан (Монгол Улас), Машбатын Баясхалан (Үбэр-Монгол), Чингис Раднаев (Буряад орон), Монгуш Сайдаш (Тыва), Лиджи Горяев (Хальмаг) гэгшэд халуун зүрхөөрөө Түгнын талын малшадта дуунуудаа бэлэглэбэ...
Дэлхэй, ши, соносоорой,
Хүхэ Тэнгэриин монголшууд дуугаа дуулажа байна.
Дэлхэй, ши, хараарай,
Эзэн Чингисэй Монгол, нэгэдэн, дуулажа байна;
Хамаг Монголой үрэ сад, омогшон, дуулажа байна…
Монгол ёһо, зан заншал, язгуур урлаг, түүхэһээ бүрилдэһэн тулгада Бүхэдэлхэйн Монголшуудай хамтын гал 5 эрхим дууша хүбүүд бадарааба. “Дэлхэйн монголшуудай гал хэтэ мүнхэдөө мандан бадархань болтогой!” – энэ уряае арад зон “Хурай” гэжэ дэмжэбэ.
Эдэ дуушадые айхабтар халуунаар, баяртай гунигтайгааршье угтажа абаһан харагшад наадай һүүлдэ баран дүхэриглэжэ ёохорлоо. Табан дуушад өөрынгөө хубитые дасан барилгада баһал оруулаа.
Энэ марафондо хамта дээрэ 270 мянган түхэриг суглараа. Энэ үйлэ хэрэгые “Информ-Полис” һонин үйлэдэжэ, БГТРК-инфо эбээн тэдхэгшэ болоо. Буян үйлэдэхэ дэмбэрэлтэй энэ һайхан хэрэгтэ сэдьхэлэйнгээ уряалаар хабаадажа, хандиб үргэжэ, һайхан һанаагаар, һайхан үгөөр эрхилэгдэһэн хэмжээ ябуулгые дэмжэһэн хамаг олондо баяр баясхалан хүргэнэбди!
