Энэ, юу хэлэхэб, үнинэй хүлеэгдэhэн мэдээсэл. Должон Жаргаловна 1988 онhоо, Ленинградай Гүрэнэй театрай, хүгжэмэй болон киногой Дээдэ hургуули дүүргэжэ ерэhээр мүнөө хүрэтэр түрэл театртаа таhалгаряагүй ажаллажа ябана.
Монгол уран зохёолшо С. Жаргалсайханай «Галаб эрьехын урда» гэhэн зүжэгтэ түрүүшынгөө Алтанай роль наадажа эхилээд лэ,.. театрта табигдаhан бүхы зүжэгүүдтэ 25 жэлнүүдэй туршада арад зондоо баяр үргэжэ, гунигынь сэлмээжэ ябанал даа. Тэрээнhээ гадна хэдэн олон кинонуудташье наадажа үрдеэ.
Хүн талаараа урин налархай, нүхэдтөө үнэн, тэрэ мүртөө мэргэжэлэйнгээ дээдэ шатада ябаhан иимэ зүжэгшын гүрэн түрын үндэр хайрада хүртэхэдэ театрай хамта олон баярлажа байhанаа мэдүүлнэ…
…Минии hургуулиин наhанай, аха классуудта hуража байхада, суг hурадаг нүхэрэймни наhаараа малшан ябаhан аба Москва ВДНХ ошожо ерээ бэлэй. Колхозой ноёд малшадайнгаа hууринуудые эрьежэ ябахадаа, тэрэ малшанайда хүрэжэ орбод. Саана-наана хөөрэлдэhөөр:
– Буда Семёновичнай хайшаа ошооб? – гэжэ ноёдой асуухада, Долгор хүгшэниинь:
– Манай Буда Москваhаа мэдэлтэй хүн, хайшаашье ошоходоо маанарhаа асуухагүй, дүүрэн эрхэтэй хүн ха юм даа, – гэжэ харюусаhан юм ха.
Тэрэ гэhээр Буда Семёновичнай нютаг соогоо «Москваhаа мэдэлтэй хүн» боложо алдаршаа бэлэй.
Театрай зон хадаа хүхижэ байял даа, энэ үнэн болоhон ушар тухай миил, хүхюунэйхиие гэжэ, эндэ бэшэбэб, гэбэшье тон харюусалгатай, хүндэшье, хүндэтэйшье ажалтай бэлигтэнэй үдэр hүнигүй, үргэhэ нойргүй арад зондоо алба хэhэн ушарай иигэжэ үндэрөөр сэгнэгдэхэдэ, баярлангүй байжа болохогүйл байнал даа.
Үндэр нэрэ зэргээртнай, хүндэтэ Должон Жаргаловна! Үшөөшье үндэр туйлалтануудые, аза жаргал хүсэнэб!
