Мүнөө мүн лэ тиимэ хэмжээнэй гастрольнууд аймаг соогуур 6 үдэрэй туршада үргэлжэлхэ. Энэ удаа Захааминай харагшадта театраймнай hүүлэй үедэ табиhан ехэ зүжэгүүд, нэрлэбэл Карло Гоцциин «Турандот» ород хэлэн дээрэ, буряад хэлэн болон буряад ажабайдалда сүм оруулагдаhан молдаван уран зохёолшо Ион Друцын «Залуугаймнай шубууд» (ород хэлэн дээрэ оршуулгань уншагдаха), тиихэдэ бишыхан захааминайхидта онтохонууд дурадхагдаха.
Үдэр үдэрөөрнь абажа харахада иимэ байна:
Сентябриин 23-най үдэр 11 сагта Дүтэлүүр тосхондо Г. Нанзатовай «Сказка о жирном Замае и Мангадхае» гэжэ онтохон табигдаха. Энэл онтохон 24-нэй үдэр 11 сагта Холтоhон hууринда, 25-да 11 сагта Сахирта (Ехэ-Сахирайхид ошожо хараха), энэл үдэр 14 сагhаа Мэлэ, Борто, Баян-Голойхид нэгэ газартаа сугларжа хараха, 26-27-до 11, 16 сагуудта Закаменск хотын хүүгэдэй сэсэрлигүүдтэ харуулагдаха юм.
Театраймнай залуу артистнарай хабаадалгатай «Барабанщик-Хэнгэрэгшэ» гэжэ үльгэр-хэшээл 23-най 11 сагта Үлэгшэндэ, 24-нэй 11 сагта Михайловкада, 25-най 11 сагта Санагада, 26-27-ной үдэрнүүдтэ 11 сагта Закаменск хотын hургуулинуудта табигдаха.
Тиихэдэ залуу артистнараймнай наададаг «Шутки Чехова» («Медведь» и «Предложение» гэhэн богони хэмжээнэй хоёр зүжэг) 25-да 13 сагта Санагада, 26-27-ной үдэрнүүдтэ 14 сагhаа Закаменскын hургуулинуудта харуулагдаха байха.
Дээрэ нэрлэгдэhэн «Турандот» гэжэ зүжэг Закаменск хотын Соёлой ордон соо 23-24-нэй 19 сагта, «Залуугаймнай шубууд» 26-27-ной үдэрнүүдтэ 19 сагhаа харуулагдаха, гастролиин үдэрнүүд Закаменск хотын Соёлой ордон соо 28-най үдэшын 19 сагhаа ехэ Гала-концертээр түгэсэхэ байна.
Эдэ үдэрнүүдэй туршада Захааминай аймагай харагшад театраймнай бүхы артистнартай уулзаха, тэдэнэй тоодо Россиин арадай артистнар Марта Зориктуева, Михаил Елбонов, Лариса Егорова, Россиин габьяата артистнар Олег Бабуев, Дамбадугар Бочиктоев, тиигээд лэ саашадаа Буряадаймнай арадай болон габьяата артистнар, залуушуул – барандаал буужа ерэхэл даа, хүлеэгээд байгаарайт.
Уулзатараа, хүндэтэ Захаамин хангаймнай харагшад!
