– Галина Шойдагбаева, Дугаржаб Дашиев, Саян Раднаев гээд манай арадай суута дуушадай хүсөөр манай театрай тайзан дээрэ «Аида» табигдадаг байhан юм. Тииhээр энэ оперо табихаяашье зүрхэлдэггүй байгаабди. Мүнөө шэнэ, бэрхэ, бэлигтэй, хүндэ партинуудые дуулажа шадаха аргатай дуушад бии болоо. Шэнэ саг хатуу эрилтэнүүдые табина. Тиимэhээ тэрээндэ таараха эгээл дээдын мэргэжэлтэй артистнар лэ «Аида» оперодо наадажа шадаха, – гэжэ премьерын урда Буряадай Правительствада үнгэрhэн уулзалга дээрэ Россиин арадай артист, театрай оперо найруулгын таhагай хүтэлбэрилэгшэ Дарима Линховоин хэлээ бэлэй.
Аида хадаа дайнай үедэ хамалганда ороод, Египедэй фараоной богоол болошонхой, үнэн дээрээ Эфиопиин хаанай басаган… Хоёр гүрэнэй дайн дажарай үедэ гурбан хүнэй дуран, жүтөөрхэл, үhөө абахын хэрзэгы хүсэл, Эсэгэ ороноо, дураяа абархын эрмэлзэл гээд, олон хүнүүдэй гүн сэдьхэлэй бодол, hанаан – барандаа холисолдошонхой, hүрөөтэй, хүлгөөтэй байдал харуулагдана…
Олон жэлнүүдэй туршада Аидын роль наадажа ябаhан, СССР-эй арадай артист Галина Шойдагбаева, энэ оперые хараад байхадаа:
– Мүнөөдэр үнгэhэн наадые хаража hуухадаа театрнай одоошье hэргэжэ эхилбэ, hайн, амжалтын харгы гаража захалба гэhэн найдал түрэбэ. Энэ үдэрэй наадан бүхы талаараа hайн байба. Тайзанай шэмэг, артистнарай хубсаhан харагшадые гайхуулба. Минии оюутад мүнөөдэр бүхы байhан арга шадалаа харуулжа, намайе ехээр баярлуулба, – гэжэ хэлэбэ.
Энэ оперые табихын түлөө манай театр Санкт-Петербург хотоhоо үндэр шатын мэргэжэлтэдые уриhан байна: Мариинска театрай дирижёр Леонид Корчмар, найруулагша Алексей Степанюк, Россиин арадай уран зурааша Вячеслав Окунев гэгшэд.
