Манай орондо байдаг полягуудай соёл, хэлэ hэргээхэ зорилготой шэнжэлгэнүүдые хэжэ эхилhэн Вацлав Соколовский өөрыгөө тойруулан нэгэ бодолтон, нэгэ hаналтаниие 1993 онhоо суглуулжа захална. Тэрэ гэhээр манай хотодо полягуудай үндэhэн соёлой бэеэ дааhан эмхи бии болоhон, эдэбхитэй hайнаар хүдэлжэ байдаг, олон тоото хэмжээ ябуулгануудые саг үргэлжэ эмхидхэжэ байдаг юм. 1995 ондо поляк хэлэнэй амаралтын үдэрэй hургуули гэжэ бии болоо. Хүршэ Эрхүү хотодо Польшын Республикын консульство бии юм, Буряадай эмхи энэ консульстватай тон дүтын харилсаатайгаар ажалаа ябуулдаг, саг үргэлжэ эмхидхэгдэжэ байдаг олон тоото хэмжээ ябуулгануудта, уулзалгануудта эдэбхитэй хабаадалсажал байдаг. Мүнөө энэ үедэ Улаан-Үдэ хотодо байдаг эмхиие ударидажа байдаг хүн тухай хоёр үгөөр хэлэбэл, Мария Иванова Ленинград хотын Профсоюзуудай дээдэ hургуулида нютагhаань ерэжэ hураад, 1981 ондо тэрэ hургуулияа түгэсхэжэ, суг hураhан Геннадий Иванов гэжэ буряад нүхэртөө хадамда гаража Улаан-Үдэ ерэhээр, саг үргэлжэ соёл, урлалай талаар харюусалгата тушаалнуудые эзэлжэ ябаа. Улаан-Үдэ хотын Захиргаанай Соёлой таhагта орлогшо даргаар олон жэл ажаллаhан, мүнөө Буряадай Гүрэнэй академическэ драмын театрта ажалтай, даажа ябаhан тушаалдаа харюусалга ехэтэй, суг ажалладаг нүхэдтөө эрилтэ болон найдамтай, үнэн зүрхэнhөө хандасатай хүн юм.
Буряад Республикын Толгойлогшын, Буряад Республикын Правительствын, Буряад Республикын Соёлой яаманай болон Эрхүүдэ байдаг Польшын Республикын түлөөлгын дэмжэлгээр энэ баяр Мария Ивановнагай эмхидхэлгэ, ударидалга доро үнгэрбэ гээшэ. «Полягууд Буряадта» гэжэ долоодохи номой нюур нээлгын баяр И. Калашниковай нэрэмжэтэ хотын номой hанда үнгэрөө. Арадуудай Хани барисаанай ордон соо Польшын хэлэ болон соёлой ниитэ hургуулиин hуралсалай жэл нээгдээ, «Полонийскэ уншалганууд-2013» гэhэн эрдэм-дүршэлэй бага хурал Зүүн-Сибиириин Соёл урлалай дээдэ hургуулида сентябриин 20-до үнгэрөө. Тэрэл үдэшэндөө С. Равичай зохёолнуудаар табигдаhан «Гэр тээшээ» гэhэн зүжэг харагшадай анхаралда дурадхагдаа. Ц. Сампиловай нэрэмжэтэ уран зурагай үзэсхэлэндэ «Польшын мүр сараа Буряадай түүхэдэ» гэhэн үзэсхэлэн дэлгэгдээ гэхэhээ эхилээд олон hонирхолтой хэмжээ ябуулганууд үнгэрбэ. Баярай үдэрнүүд ехэ Гала-концертээр дүүрээ.
