Һуралсал болбосоролой зургаанууд буряад хэлэнэй үдэрлигэй баярые угтуулан арга хэмжээ ябуулжа эхилэнхэй. Һурагшад оюутадай, сэсэрлигэй хүүгэдэй дунда уран һайханаар шүлэглэмэл зохёол уншаха конкурс үнгэргэгдэнэ. Буряад хэлээ һайн мэдэгшэдэй дунда оюун ухаанай тэмсээнүүд болоно. Буряад һургуулинуудай һурагшад найруулга ба диктант бэшэлгээр урилдана. Һургуулинуудта уран зохёолшодтой ба хүгжэм найруулагшадтай уулзалганууд, ирагуу найруулагшадай үдэшэлигүүд, классай сагууд эмхидхэгдэнэ.
«Буряадаар ярилдая» гэһэн акци хаа хаанагүй ябуулагдаха. Буряад хэлэнэй үдэрлигэй октябриин 25-да һургуулиин багшанар хэшээлээ эхилхэдээ һургашадаараа буряадаар мэндэшэлхэ, тэдэнэрээ амаршалха юм. Энэ акцида буряад хэлэнэй багшанарһаа гадна бүхы түрэлэй багшанар оролсохо юм.
Октябриин 8-да уласхоорондын «Эдир Будамшуу» конкурс боложо үнгэрөө. Эндэ 40 хүүгэд хабаадаа. Буряадай аймагуудһаа гадна Агын, Усть Ордын, Шэнэхээнэй, Монголой үхибүүд оролсожо, бэлиг шадабаряа харуулаа, артистын хэшээл бэлэдхэл гараа.
«Ариг Ус» телекомпанида видеоролик буулгагдажа байна. Мэдээжэ хүнүүд, элдэб наһанай ба үндэһэ яһанай хүнүүд буряад хэлэн дээрэ шүлэг уншажа үгэхэ юм. Буряад хэлэнэй онсо баялиг харуулхын тула нютаг хэлэнэй аялган дээр зарим хүнүүд шүлэгээ уншаха юм. Энэ ролигто эхирэд булагадай, сартуул сонгоолой, хурамхаан баргажанай, шэнэхээнэй, монголой буряадай аялган зэдэлхэ.
Үндэһэнэй номой санда ехэ юумэн хэгдэхэ. «Үнэр һайхан буряад хэлэн» гэһэн тэмээр найруулга бэшэлгээр урилдаан болохо, буряад номуудай үзэсхэлэн дэлгээгдэхэ, поэдуудтэй уулзалганууд эмхидхэгдэхэ.
Энэ жэл анха түрүүшынхеэ шог хөөрөөнэй конкурс эмхидхэгдэхэ. Тэмсээндэ хабаадаха улаан хурса хэлэтэн энеэдэтэй ушар, болоһон ябадал, онтохон, шог ёг үгүүлэл хөөрэхэ, богонихон сценкэ наадаха.
Октябриин 25-да Буряадай драмын эрдэмэй театрта Буряад хэлэнэй үдэрлигэй баяр ёһолол болохо, тэндэ дуу бүжэгэй ехэ тогтлолто байха ба республикын тэмсээнүүдтэ шалгарһан хүнүүдтэ бэлэгүүд гардуулагдаха. Энэ тоглолто дээр «Аялгата һайхан буряад хэлэмни» дуунай шэнэ видеоклип харуулагдаха юм. Энэ дуунай үгэнь Хэнтийн Батхуугай, аялга хүгжэмыень профессор Шарав найруулаа, Билигма Ринчинова ба оперын театрай залуу дуушад гүйсэдхэнэ.
Буряад хэлэнэй үдэрлигые хаа хаанагүй амьдардаг буряад үндэһэтэн дэмжэжэ байна. Эдэ үдэрнүүд соо Ара Байгалай хизаарта, Эрхүү можодо үргэнөөр тэмдэглэнэ. Москвагай, Санкт Петербургын, Томскын, Яхадай, Новосибирскын, Улаан-Баатарай буряадууд баһал элдэб арга хэмжээ эмхидхэнэ, эхэ хэлээ магтан түүрээнэ.
