Ушар юуб гэхэдэ Наран хатан эжын үбэр талада, Хори буряадуудай ажаhуудаг бүхы нютагуудые нюур талаараа зүглэн hүн эдеэгээрээ сэржэмдэжэ байhан удхатай хүшөө Хориин хатадта зорюулагдан табигдажа, 18-най үдэр 14 сагта тэрэ хүшөөгэй нээлгын баяр арбан нэгэн эсэгын түлөөлэгшэдэй, сэхээтэнэй болон республикын засагай газарай алба хаагшадай хабаадалгатайгаар үнгэрхэ гэжэ байна. Бүри урдандаа, Хориин аймагай соёлой таhагай дарга байха үедөө, Бато Далаевич Цыдыпов энээн тухай дурадхал оруулhан гэжэ мэдээжэ, тиин мүнөө үедөө энэ hанаашалгынгаа хүсэндөө хүрэжэ байхада, үдэр hүнигүй ябуулгануудые хэжэ, эмхидхэлэй ехэхэн хүдэлмэри ябуулжа, тэрэнэйнь үрэ дүн Наран Хадынгаа үбэртэ нара хараха гэжэ байна бшуу.
Наран хатан, Бальжан хатан, Шойжод хатан, Эреэшхэн удаган болон бусад түүхэдэ мүнхэрhэн хатадhаа гадна уг гарбалайнгаа нэрэ hүлдые үргэжэ, арад түмэнэйнгөө алдар нэрэдэ горитойхон хубитаяа оруулhан Цырен-Дулма Дондокова, Цырен-Дулма Дондогой, тэдээнhээ саашадаа мүнөө үедэ эгээл зохёохы хүсэн дээрээ ябажа байhан СССР-эй арадай артист Галина Шойдагбаева болон бусад мүнөөдэрэй, ерээдүйн олон хатадай хамтын хүшөө мүндэлбэ гэхэ дүүрэн эрхэтэйбди.
Буряадай уран зохёолшодой холбооной түрүүлэгшэ Матвей Рабданович Чойбонов энэ хэрэгые халуунаар дэмжэжэ, айхабтар ехэ туhа хүргэбэ гэжэ бүхы хориинхидай баяр баясхалангые мэдүүлжэ байhанаа Бато Далаевич элирхэлбэ hэн.
Алдартай, сутайхан араднай
Арюухан хатадтаа баяртай.
Үргэжэ солыень дуудаха
Үргэлжэ нангинхан заятай…
Арюухан дангина хатаднай –
Сарюухан, зулгыхан хүүхэднай,
Түүхынгээ хатадhаа залгуулан,
Түлиhэн гуламтаа сахяарайт!
