Жэлдээ нэгэ дахин үнгэрдэг Буряад хэлэнэй үдэртэ зорюулагдаhан хэмжээ ябуулганууд бүхы республикаар хаа-яагүй үргэн хэмжээндэ үнгэрөө.
Үндэhэтэнэй номой hан жэл бүри найруулгануудай мүрысөө октябрь hара соо соносходог. Энэ жэлдэ «Үнэр баян буряад хэлэн» гэhэн темэ соносхогдоо hэн. Улаан-Үдэ хотын, Загарайн, Зэдын, Хэжэнгын, Мухар-Шэбэрэй, Хурамхаанай аймагуудай оюутад, hургуулинуудай шабинар болон багшанар, наhажаал зонууд энэ мүрысөөндэ эдэбхитэй хабаадаа. Һургуулиин шабинар болон оюутадай дундаhаа Зэдын аймагай С. Н. Сосоровой нэрэмжэтэ Сагаатайн дунда hургуулиин 10-дахи классай hурагша Буян-Дэлгэр Цыренжаповагай найруулга эрхим сэгнэлтэ абаhан байна. Тиихэдэ ехэшүүлэй дундаhаа Буряадай республиканска үндэhэтэнэй нэгэдэхи лицей-интернадай буряад хэлэ бэшэгэй багша Цырендолгор Бадмаевна Бадмацыренова нэгэдэхи hуурида гараа. Мүнөө Буян-Дэлгэр Цыренжаповагай найруулгаhаа багахан хэhэг харуулая:
«Yнэр hайхан буряад хэлэн.
Дэлхэй дээрэ олон янзын хэлэнүүд байдаг. Тэдэнэй дунда манай эгээл дуратай хэлэн – үнэр баян буряад хэлэн. Yнэр hайхан буряад хэлэндээ hурахадаа, олон тоото уран зохёолшодойнгоо, поэдүүдэйнгээ номуудые тон анхаралтайгаар уншаха аргатай болонобди. Бүри эртэ урда сагhаа нааша үнэр hайхан буряад хэлэмнай арадай аман үгөөр дамжан ерэhэн гэжэ hанадагби. Хүн бүхэн түрэhэн эхэтэй, түрэлхи хэлэтэй, түрэhэн тоонто нютагтай, тиимэhээл түрэлхи хэлэмнай үнэр hайхан буряад хэлэн гээшэл даа.
Хэрэглэмжэгүй, орхисооной боложо байhан буряад хэлэеэ хүн бүхэн үргэхэ, дэмжэхэ зорилго урдаа табиха ёhотой гээд намда hанагдадаг. Манай нютагайхин бултадаа үнэр hайхан түрэл хэлээрээ үдэр бүри омогорхон хөөрэлдэжэ байдаг юм. Би энэ буряад хэлэнhээ олон hайн hайханиие абанаб. Энэ үнэр hайхан хэлэеэ дээшэнь үргэжэл, үшөөшье баян болгожо байхые оролдохоб. «Yнэр hайхан буряад хэлэн» гэжэ дуулахадаа, досоомни наранай шаража байhан мэдэрэл бии болодог. Тиимэ хадаа үнэр hайхан буряад хэлэн – манай эхинэй эхин сэргэ. Би энэ буряад хэлэнэй үдэрнүүдтэ өөрынгөө зохеоhон «Буряад хэлэмни» гэhэн шүлэгөө зорюулнаб:
Түүхэтэ арадайм домог шэнги
Түрэл буряад хэлэмни.
Сэлмэг тэнгэриин наран мэтэ
Сэбэр буряад хэлэмни.
Арад зонойм үльгэр шэнги
Арюун буряад хэлэмни.
Зон нүхэдэйм дуун мэтэ
Зохёолто буряад хэлэмни.
Багахан үхибүүдэй дуулаhан шэнги
Буряад нангин хэлэмни.
Бардам хууршын хүгжэм мэтэ
Бурьялhан буряад хэлэмни.
Буряад хэлэеэ hайнаар шудалжа,
Буряад хэлэндээ hайнаар hурая.
Буряад хэлэмнай – дундаршагүй баялиг,
Буряад арадаа хүндэлэн ябая!»
