Хоёр жэлэй урда хитад хүтэлбэрилэгшын «Шинии хамагын ехэ хүсэл?» гэhэн асуудалда Уудам хүбүүн «Энэ дэлхэй минии таладал ногоон байг!» – гэжэ харюу үгэhэн байна. Харин мүнөө энэл асуудалда «Олон болоё» гэhэн хүсэлөө мэдүүлбэ. Лхагвасүрэн, Тогсжаргал хоёрой бүтээжэ, Жавхланай амилуулhан «Алсад суугаа ээж» гэжэ суута дуугаар бишыхан тоглолтоёо эхилжэ, Уудам хүбүүн олохон зониие уяруулба. «Уудамнай томо болоо, ямар үндэр болоо гээшэб, Тантай зурагта орожо болохо гү?» – гээд лэ олохон харагшад хүл хөөрсэг болоно. Харагшадай дунда Уудам хүбүүндэ зорижо бэлэгшье абаад ерэhэн зон бии…
Буряад орондо асаржа харуулагдаhан «Хүхэ толботой хүмүүс» гэhэн кино Монголой Киноакадемиин «Шэлдэг найруулагша», «Шэлдэг эбээн тэдхэгшэ» гэhэн тусхай шагналнуудые абаhан юм гээд тэмдэглэе. Анха түрүүн энэ киногой нээлгын баяр Монгол Улсын Түрын Ордондо үнгэржэ, гүрэнэй Юрэнхылэгшэ Элбэгдоржо энэ киногой удха шанарые үндэрөөр сэгнэжэ, монгол хүн болгон энэ кино хараха ёhотой гэжэ тэмдэглэhэн байгаа. Тэрэнэй дараа «Хүхэ толбото хүмүүс» гэжэ кино Хитад уласай Бээжэн, Франциин Парис хотонуудта амжалтатай харуулагдаа. Энэдхэгтэ, Солонгосто үнгэрhэн Уласхоорондын кинофестивальнуудта хабаадаа.
ДОЗ интертаймент студи 2005 ондо байгуулагдаhан түүхэтэй. Тайзанда, театрта, кинодо болон телевиденидэ хабаатай хамаг зүйлэй ажал гээшые ябуулжа байhан энэ студи 8 жэлэй туршада нилээн ехэхэн ажал бүтээhэн байна.
ДОЗ гэhэн үгэ аббревиатура, студи байгуулhан Доржсүрэн, Зула (Мүнгэн-Зула) хоёрой нэрын түрүүшын үзэгүүд. Эдэ хоёр зүжэгшэд сугтаа Соёл урлагай Ехэ hургуули түгэсэжэ, Драмын театрата, Х-ТУЦ гэдэг энеэдмын зүжэгшэдэй хамталигта ажаллажа, олохон дүрэнүүдые байгуулhан байха юм.
ДОЗ студиин буулгаhан кинонууд:
Энеэдэмын кино: «Дурласны маргааш», 2005 он
20 бадагтай «Өвөө бид хоёр», Үбэр-Монголой Одон-ТВ-тэй суг 2007 ондо
Драма «Амьдрах», 2009 он
«Саятан Мянга», 2011 он
«Хүхэ толбототой хүмүүс», 2012 он
Драма «Дүүлэн ниис», Солонгосто буулгагдаhан, 2013 он
Һүүл даража бүтээгдэhэн «Кино шиг амьдрал» гэhэн кино Вьетнамда буулгагдаhан, 2013 оной 11 hарын хуушаар дэлгэстэ гарахаар хүлеэгдэнэ.
