ИВАЛГЫН ДАСАНДА ҮНГЭРҺЭН БАГА ХУРАЛАЙ ШИИДХЭБЭРИНҮҮД

- «Буряад хэлэн үгы боложо байhан хэлэнүүдэй нэгэн» гэжэ ЮНЕСКО-гой 2005 оной дэбтэртэ ороhон ушарые мэдэрхэ;

- Ехэ хуралнууд болон суглаануудые Буряадай гимнээр эхилхэ, дүүргэхэ;

- Буряад оршон байдалтай (заалга болон хүмүүжүүлгын талаар) хүүгэдэй сэсэрлигүүдые элбэгээр нээхэ, байhан сэсэрлигүүдтэ буряад хэлэ заалгатай бүлэгүүдые байгуулха. Буряад Республикын үндэhэтэнэй 1-дэхи лицей-интернадтай Улаан-Yдэ хотын «Журавлёнок» сэсэрлигые нэгэдүүлэн, буряад хэлэн дээрэ үхибүүдые хүмүүжүүлэн hургадаг тусхай комплекс байгуулха;

- «Буряад үнэн» hониной захил дэлгэрүүлхэ, радио, ТВ дэмжэхэ;

- Эдеэ хоолой, эдэй дэлгүүрнүүдэй бараанай нэрэнүүдые болон сэн буряадаар дабтаха;

- Залуушуулай хоорондохи яряанай хэлэндэ дайралдадаг, хүдөө гарбалтай үетэндөө өөдэрхэнги хандасатай үгэнүүдые хорихо (головар, тормоз г.м.)

- Харгын тэмдэгүүдые, уhа голой, нютагуудай, аймагуудай, гудамжануудай, хотын унаагай буудалнуудай нэрэнүүдые буряадаар дабтаха;

- Буряад хэлэнэй хэрэглэлгэ тухай хуулида нэмэлтэ оруулха;

- Сэсэрлигүүдтэ, эхин ба дунда hургуулинуудта ород болон буряад хэлэ заалга тэгшэ хэмжээндэ гаргаха;

- Нютаг хэлэнүүдэй үгэнүүдэй тайлбари-толи найруулха;

- Сэлэнгын, Зэдын, Хяагтын аймагуудай буряад hургуулинуудта нютаг хэлэн дээрээ оршон тойрониие шэнжэлхэ арга олгуулха;

- Хүтэлбэрилхы тушаалда гаража байhан эрхэтэдтэ яряанай буряад хэлэ заатагүй мэдэхэ эрилтэ табиха;

- Гүрэнэй албанда тушаалтай буряад хэлэтэй эрхэтэдтэ булюу дэмжэлгэ үзүүлхэ;

- Түхэреэн үдэр ажалладаг FM радио, ТВ байгуулха;

- Буряад хэлэндэ hураха аргануудые олошоруулха, дистанционно заалгын арга боломжо ашаглаха;

- Эрхүү можодо ажаhуудаг буряад угсаатантай аймагуудта буряад хэлэнэй тусхай байра болон зааха асуудалнуудта онсо анхарал хандуулха;

- Буряад хэлэ зааха курснуудые олошоруулха;

- Буряад хэлэ зааха методико hайжаруулан хүгжөөжэ, найруулан нэбтэрүүлхэ;

- Залуушуулай элдэб янзын (хүгжэмэй, хөөрөөнэй, уран зохёолой, киногой г.м.) хэлэ бэшэгэй дүримүүдые баримталhан проектнүүдые дэмжэхэ;

- Дунда hургуулида түрэл хэлэн дээрэ ГИА, ЕГЭ тушаалгаха;

- ЗАГС-ын эмхи зургаанда буряад нэрэ зүүлгэ гуримшуулха;

- Буряад хэлэ заадаг багшанарай эмхи байгуулха;

- Монгол телевидени хараха арга олошоруулха.

- Энээнhээ гадна Чойдог Бамдажапов ламын түбэд хэлэнэй тайлбари-толи, тиихэдэ Ринчен Бимбаевай халха-монголой хэлэн дэрэ уран зохёол ба шүлэгүүдые бүтээжэ, Пушкин мэтэ алдартай болоhон ушарые бү мартаарайт!

Баталагдан абтаhан эдэ шиидхэбэринүүдые бэелүүлжэ байха уялгатай «Бага хурал» гэhэн хүдэлмэриин эмхи Бандида Хамба ламын дурадхалаар байгуулха:

Батоцырен Садаевич Дашинамжилов

Николай Дабаевич Бадмаринчинов

Сергей Дондогдоржиевич Бальжанов

Батор Улымжиевич Данзанов (Боохон)

Уинзориг (Монгол)

Сергей Далаевич Доржиев

Баяр Дабаевич Дугаржапов (Ага)

Цырен Шойжонимаев

Алдар Долгоржапов (Алайрай дасанай шэрээтэ)

Светлана Тогошиевна Банзаракцаева (Бэсүүр)

Гэрэлма Майдарханова (Түнхэн)