Уран шүлэгшэ Болдын Батхүүгэй нэрые Буряад орондо үргэhэн «Аялгата hайхан буряад хэлэмни» гэжэ шүлэгөө Батхүү үшөө буряад хэлэндэ hураха түрүүшын сахим ном бэлдэхэ үедэ бэшэжэ, тэрэнь тэрэ номой нэгэ бүлэгтэ «Юртэмсын хүн түрэлтэндэ Эхэ хэлэнһээ мүнхын аршаан үгы. Эхэ хэлэеэ мартабал, мүхэлэй үүдые нээнэ» – гэжэ нэрэ боложо тодорhон бэлэй.
Тиигэжэ хэдэн жэлэй үнгэрөөд байхада энэл шүлэгыень Монголой дээдэ гарай хүгжэм зохёогшо Бямбасүрэнгийн Шарав абажа хүгжэм найруулаад, тэрэнь Буряадай арадай артист Билигма Ринчиновагай энэ жэлэй эрхим гэжэ тодорhон түрүүшын CD дискдэ ороо, манай дуушад Билигма Ринчинова, Мэргэн Санданов, Сультим Дашапылов гэгшэд түрүүшын гүйсэдхэгшэд болоо бэлэй. Энэ дуугаарнь Монголой MS studio клип бүтээжэ гаргаад, тэрэнь хүгжэм дуунда дуратайшуулда горитойхон бэлэг боложо дэлгэрээ.
Һүүлэй үедэ домог боложо байhан эдэ үгэнүүдэй автор Монгол ороной Хэнтэйн аймагта түрэhэн юм. Тэндэ Россиин дэбисхэр дээрэhээ өөрынгөө үедэ олон зон гаража ошоhон гэжэ мэдээжэ. Нютагайнгаа нэрэ hүлдые үргэжэ, Хэнтэйн Батхүү гэжэ нэрээрээ алдаршаhан хүн. Энэл нэрээрээ Намжил Нимбуевай нэрэмжэтэ түрүүшын уласхоорондын мүрысөөндэ шалгаржа, тэрэнэй Буряад орондо мэдээжэ болоhон ушар эндэhээл эхитэй.
Һаядаа болохоёо байhан тэрэ үдэшын шэмэг гээ hаа алдуугүй – Самандын Жавхлан Эрдэнэчимэг hамгантайгаа дуулаха байна. Жавхланай гүйсэдхэдэг олохон дуунуудые Буряадай харагшад болон шагнагшад мэдэхэ.
Тиихэдэ энэ үдэшын үшөө нэгэ hонирхолтой талань гэбэл – Шэнэхээн нютагай буряад гарбалтай дуушан Сэсэгмаа байха. Болдын Батхүүгэй үгэнүүд дээрэ Бүринбаярай бэшэhэн «Аба эжы хоёрни» гэжэ дуун манай шагнагшадта мүн лэ мэдээжэ болонхой. Шэнэхээн нютагhаа эдир дуушан Һамын Цэгмэд ерэхээр хүлеэгдэнэ.
Хитадай мэдээжэ «Жалам хар» бүлгэмтэй танилсалга тэрэл үдэшэ болохо, юрэдөө ехэл hогирхолтой үдэшэ үнгэрхэ гэhэн найдал байна.
Болдын Батхүүгэй нютагhаа уран бүтээлэй мэдээжэ түлөөлэгшэд бууха гэбэл – үльгэршэ-магтаалша Гэнэмпилийн Явгаан, Монголой соёлой габьяатан Цагаадайн Мөнхболд, Монголорй дуурь бүжэгэй театрай дуушан Шаравын Энхбат, дуушад Нарангэрэлийн Ундрал, Хүдэрчулууны Дуламсүрэн.
Мүн лэ буужа ерэхэеэ байhан соёл урлалай мэдээжэ нэрэтэн – Монголой арадай артист Б. Шарав, Монгол ороной мэдээжэ хүгжэм зохёогшо Н. Жанцанноров, хүгжэм зохёогшо Б. Цэвээнсүрэн.
Болдын Батхүүгэй эды үндэр нэрэ түрэтэй айлшадай дунда манайшье солотон хабаадалсажа, орон нютагаа түлөөлхэ байна. Чингис Раднаев, Билигма Ринчинова, Намхайн Мөнхзул, Балданцэрэнгийн Батттүвшин, Мэргэн Санданов, Болдын Ганцэцэг, Сультим Дашапылов, хүгжэм зохёогшо Галмандахын Баттулга.
Эды үндэр нэрэ солотоной хамтарhан наадан Улаан-Үдэ хотодо болобо гэжэ балай дуулдаашьегүй, ерэхэ, хараха, шагнаха хэрэгтэйл даа!
