Цыдендамба Пурбуевич 1934 оной апрелиин 22-то Бэсүүрэй аймагай Дабаата тосхондо түрэhэн юм. Шэбэртын hургуулида 7 класс дүүргээд, 1953 ондо Улаан-Үдэ хотын 18-дахи буряад hургуули дүүргэhэн байгаа. Тэрэнь мүнөө үндэhэн яhатанай нэгэдэхи лицей-интернат болонхой. Тэрэл жэлдээ шэлэгдэн абтаhан 20 бэлигтэнэй дунда Ленинград хотын А. Н. Островскийн нэрэмжэтэ театрай дээдэ hургуулида hурахаар эльгээгдэнэ. 1958 ондо дээдэ hургуулияа дүүргэжэ Буряад орондоо бусажа ерэлгэнь Буряадай уран зохёол болон урлалай Москвада үнгэрхэ 2-дохи Арбан хоногтой тудалдажа, мүнөө-мүнөө орожо ерэhэн театрай залуу мэргэжэлтэд энэ бэлэдхэлдэ хам оролсоо, хабаадалсаа бэлэй. Түрэл театртаа ерэхэдэнь тэдэниие театрай аха захатан – Ч. Генинов, Н. Гендунова, М. Степанова, Ж. Иванов, В. Халматов, П. Николаев, Г. Лосев, Ю. Шангина, Д. Дондуков, С. Рабсалов, С. Гончикова гэгшэд халуунаар угтан абажа, нангин хэрэгээ саашадань дамжуулха найдамтай халаандаа этигэл найдалаа сүм зорюулаа.
Нүхэдэйнгөө дунда Цыдендамба Пурбуевич театрай, зүжэг табилгын бүхы эрилтэнүүдтэ адли тэгшэ таараhан, дүрбэн тэгшэ бэлигтэй артист байhанаа харуулжа захална. Тэрэнэй байгуулhан рольнууд гэбэл: А. Грибоедовэй «Горе от ума» гэжэ зүжэгтэ Молчалин, Лопе де Вегын «Укрощение строптивой» гэжэ зүжэгтэ Люченцио, Ч. Ойдобой «Далан худалчда» Сэнгэ, Ч. Гениновэй «Соёлма, Баташулуунда» Баташулуун, «Козы Корпеш и Баян Слуда» Карабай, К. Тренёвой «Любовь Яровая» зүжэгтэ улаан сэрэгшэ Роман Кошкин, М. Горькийн «Последние» зүжэгтэ Иван Коломийцев, Х. Намсараевай «Тайшаагай ташуурта» Тарба Жигжитов, «Ээдрээ» гэжэ монгол зүжэгтэ Сүхэ-Баатар, Х. Намсараевай «Сэрэмпэлдэ» Сэрэмпэл болон олон тоото бусад.
Хэдэн ондоо дотор тамиртай хүнүүдэй рольнуудые эрхим хэмжээндэ харуулха шадабарияа гэршэлhэн Цыдендамба Пурбуевичта мэргэжэлэйнь алхам бүхэн өөрынь зүгhөө эрилтэ ехэтэйгээр дабагдажал байгаа. Эндэ Ч. Айтматовай «Улаахан пулаадтай уляангирни» гэжэ зүжэгтэ тэрэнэй наадаhан Байтемирые нэрлээгүйдэ аргагүй. 1973 ондо Ленинград хотодо үнгэрhэн Бүхэроссиин хоёрдохи фестивальда хабаадахадаа туйлаhан амжалтань үндэрөөр сэгнэгдээ. Ц. П. Пурбуев болон найруулагша С. Будажапов хоёрто 1-дэхи шатын дипломууд барюулагдажа, уран зурааша В. Бройко, артистнар Л. Дугарова, М. Жапхандаев, Ц. Пурбуев гэгшэд Буряадай Гүрэнэй шагналда хүртэhэн байха юм.
1987 ондо Буряад театрай захирал Ц. Балбаров Ц. Пурбуевые театрай захиралай тушаалда өөрөө зууршалhан юм. Цыдендамба Пурбуевич эгээл хүшэр жэлнүүдтэ 1995 он болотор 8 жэлэй туршада театраа толгойлжо ябаа.
Ц. П. Пурбуевай hүүлшын хүдэлмэринүүд гэжэ нэрлэбэл: Ф. Буляковай «Хүгшэд хадамда гаран алдаба» гэжэ зүжэгтэ Абдулла, Д. Батожабайн «Төөригдэhэн хуби заяанда», Б. Гавриловай «Чингисхаанда» авторай үгэнүүдые, О, Нилэй «Любовь под вязами» гэжэ зүжэгтэ Кэбот, Б. Гавриловай «Эртэ урдын ёhо заншалаар» гэжэ зүжэгтэ Агууехэ дайнай ветеран Юндэн…
Хүршэ Монгол оронтой харилсаа hайнтай ажаллажа байдаг манай театр нэгэнтэ бэшэ зүжэгүүдээ абаад ошожо байдаг. Цыдендамба Пурбуевич оло удаа артист мэргэжэлээрээ, хожомынь театраа толгойлжо байхадаа ошодог байгаа, тэрэнэй олон тоото хайра шагналнуудай дунда Монгол ороной хоёр медаль бии.
Ц. П. Пурбуев хүндэ хандасаараа, ямаршье тушаал зэргэтэй хүнүүдээр ойлголсожо ядахагүй зангаараа илгардаг хүн байhан юм. Хүниие хайрлаха, гамнаха, дэмжэхэ сэдьхэлтэй хүндэ нүхэд олон байдаг, Цыдендамба Пурбуевич эгээл тиимэ хүнүүдэй нэгэн ябаа бэлэй даа. Тэрэнэй гэрэлтэ дурасхаал театрай түүхэдэ, тэрэниие мэдэхэ, тэрээнтэй харилсажа ябаhан хүнүүдэй сэдьхэлдэ мүнхэ үлэхэ.
