Өөрын онсо һонин бэшэгтэй уран зохёолшо Ким Шогдопович Цыденов 1937 оной декабриин 4-дэ Яруунын аймагай Эгэтэ нютагта колхознигай бүлэдэ түрэһэн юм. 1944 оной намар Эгэтын эхин һургуулида ороо. 1948-51 онуудаар Үльдэргын долоон классай һургуулида, саашадаа Нарһатын дунда һургуулида һураа. Нэгэ жэл Эгэтын МТС-тэ ВЛКСМ-эй Яруунын райкомой инструктораар хүдэлөө. 1955 онһоо эхилээд 1960 он болотор Доржо Банзаровай нэрэмжэтэ багшанарай институттэ һураа. Институдээ дүүргэжэ, түүхын ба хэлэ бэшэгэй багша боложо гараад, Үльдэргынгөө долоон классай һургуулиин шабинарта ном заагаа. 1961-62 онуудаар «Яруунын үнэн» гэжэ аймагай газетын харюусалгата секретаряар, мүн Хориин «Шэнэ Үдэ» газетэдэ хүдэлөө.
Һүүлэрнь Үльдэргын дунда һургуулида түүхэ ба ород хэлэ, литература заагаа, тэндээ директорэй орлогшоор, хожомынь директорээр хүдэлһэн.
Ким Шогдопович Цыденов ниитын ажалда эдэбхитэйгээр хабаададаг һэн. 1966 ондо ВЛКСМ-эй XV съездын делегадаар һунгагдаһан байна.
Ким Шогдопович Цыденов үдэһэн, тэнжэһэн нютагайнгаа байгаалиие эдир бага наһанһаа һайхашаажа, һайхан бодолнуудаар эзэлэгдэн ябаһан бэлэй.
Ким Цыденовэй бэшэһэн шүлэгүүд, рассказууд республикын газетэнүүдтэ, «Байгалай толон», «Байгал», «Байкал» журналнуудта, хамтын болоод эстрадын суглуулбаринуудта толилогдодог, радиогоор, телевиденеэр дамжуулагдадаг байһан юм. Ким Шогдоповичай бэшэһэн «Һарата һүнинүүд» гэжэ рассказуудай ном 1961 ондо хэблэгдээ. Удаань «Бусахал даа хабар» гэжэ повесть (1964 он), «Весна возвратится» (1967 он), «Һарата һүни» (рассказууд, повесть) (1977 он), «Поэзиин үдэр» гэһэн ном соо уянгата шүлэгүүдынь (1960 он), «Сердце мое, Бурятия» гэһэн буряадай бэшээшэнүүдэй суглуулбари ном соо «Одинокий домик» гэжэ рассказынь (1970 он), «Чистое небо Забайкалья» гэһэн ном соо Ким Цыденовэй «На покосе» гэжэ нэрэтэй рассказынь Буряадай номой хэблэлээр гараа һэн. Тиихэдэ «Бусахал даа хабар» (Весна вернется), «Һарата Һүнинүүд» (Лунные ночи) гэһэн номуудынь электронно каталогта ба «Бурятика» НБ РБ гэһэн электронно номой һанда ороо. Ким Шогдопович Цыденовэй рассказууд 2012 ондо хэблэгдэһэн «Таёжная, озёрная, степная» гэжэ нэрэтэй буряадай уран зохёолшодой 15 боти номууд соо оролсоһон байха юм.
«Залуу уран зохёолшын рассказуудые уншаһан хүн бүхэн тэрэнэй бэшэлгын шэнжые, буряад литературада байгаагүй маягые онсолон тэмдэглэһэн юм. Илангаяа америкын зохёолшо Эрнест Миллер Хемингуэй, немец бэшээшэ Эрих Мария Ремарк мэтын Баруунай болон ородой зохёолшо И. А. Бунин гэхэ зэргын оюун бэлигтэнэй маягые һануулна гэжэ Александр Жамбалдоржиев, Цэрэн-Анчик Дугар-Нимаев гэгшэд тэмдэглээ агша һэн» – гэжэ Ц-Д. Дондогой «Уяхан зүрхэтэй үеымнай нүхэр» гэжэ Буряад үнэндэ хэблэгдэһэн статья соогоо 1997 ондо бэшэһэн байдаг.
«Ким Цыденов эдир наһанһаа захалжа, уран зохёолой, эрдэм ухаанай номуудые элбэгээр уншаһан, шудалһан, олон юумэ һониноор хөөрэжэ, тайлбарилжа үгэдэг, үргэн мэдэсэтэй, бэлэдхэл ехэтэй хүн байгаа.
Алтан дэлхэйдэ эдлэхэ ажабайдалай эхин – бага наһаяа арюунаар дурсажа, дулааханаар түүрээхэ гээшэ оюун бодолой, сагаан һэшхэлэй хэрэг даа. Ким Цыденов эгээл тиимэ бодолтой, һэшхэлтэй, үшөө тиигээд оюун мэдэрэлэй бэлигтэй хүн байгаа. Ким Цыденов зохёолнууд соогоо түлэб хүнэй наһанай арюухан үглөөе, тэрэнэй шүүдэртэй ногоон зүлгэ хаһые эхэ байгаалиингаа энгэртэ мэшэеэн хаража, оюун бэлигэйнгээ мэдэрэлээр түрэл арадтаа түүрээжэ эхилһэн ябаал...» (Б.Н.Жанчипов «Сагуудай сууряан». – Улаан-Үдэ, 2007.)
Ким Шогдопович Цыденов һүүлэй үедэ түрэл нютаг тухайдаа томохон зохёол бэшэхэ гэжэ бэлэдхэлэй хүдэлмэри ябуулжа байтараа түргэн үбшэндэ нэрбэгдэжэ, тэрэ хүсэлөө бэелүүлжэ үрдеэгүй. Оройдоол 34 наһандаа үнжэгэн нимгэн сэдьхэлтэй Ким Шогдопович Цыденов энэ дэлхэйтэй хахасаа бэлэй...
