Шажанай дэлгэрэлгэ болон хүгжэлтэдэ тэрэнэй оруулhан хубитые сэгнэхэнь хүндэ. Бидия Дандарон шажанай асуудалнуудые тэдэнэй эди шэдиин, ухаагаар болодоггүй юрэ бусын арга, нюусануудые хаажа, халхалжа байhан хүшэгэ hэхэжэ, мүнөө үеын гүн ухаанай хэлэн дээрэ тон тодорхойгоор харуулан хэлэhэн түрүүшын хүнүүдэй нэгэн болодог. Бидия Дандарондо айхабтар хүндэ хуби заяан тудаhан байгаа. Тэрэнэй этигэл саг үргэлжэ hэжэгтэ орожо, хүдэлмэринүүдынь өөрынгөө сагые хүлеэн, тэрэ үедөө ойлгосо багатай байhан гэхэдэ болохол даа.
Энэ номые бүридхэн суглуулжа бүтээhэн хүн гэбэл, мүн лэ шажанай hургаалнуудаар эрдэмтэн Андрей Стрелков номой нюур нээлгын баяр дээрэ үгэ хэлэхэдээ: «Бидиядара Дандароной заншалнууд Бурхан багшада сэб сэхэ тудана, харин тэрэнэй хойто наhанай харгы Вималакиртада (арюухан, сэбэрхэн гэhэн удхатай) хабаатай» – гэбэ. Б. Дандароной түрэлэйхид, шабинарынь болон тэрэнэй хэрэг үргэлжэлүүлэгшэд богонихоноор мүртөө тон гүнзэгы шанартай мэдээсэлнүүдые энэ номдо оруулалсаа. Ном дотор түбэд бэшэлгэшье анхарагдаха байха.
Бидия Дандароной түрэhөөр 100 жэлэй ойдо зорюулагдажа бүтэhэн энэ номой баярта Хэжэнгын аймагай толгойлогшо Г. Лхасаранов, аймагай Зүблэлэй түрүүлэгшэ Б. Шойдоков, Хэжэнгын дасанай шэрээтэ Гармажаб лама гэгшэд үгэ хэлэhэн байха юм.
