Ород арадайнгаа шажанай hайндэр үнгэргэжэ ядаhаар байтарнай жэлнай хуушаржа, Шэнэ жэлнай үглөө-мүнөө гээд лэ газаа тулажа, дүтэлжэ ябана даа. Үндэhэн арадайнгаа үндэр hүлдые үргэжэ ябадаг Буряад театр энэ жэлэй Сагаалганда Морин эрдэниеэ али олон талануудhаань харуулан, тон гүнзэгы мэдээсэлэй удхатай, хүгжэмтэй, дуутай, тиихэдэ хэзээ бэшэ hэм – тэрэл шогтой зугаатай наадаяа дэлгэхэ, бэлэдхэлэй ажал түлэг соогоо. Сагаан hарын найр нааданда манай тайзан дээрэ театрайнгаа мүнөө энэ үедэ ажаллажа байhан бүхы артистнарые хараха аргатайт, иимэ ушар үсөөхэл дайралдадаг ха юм даа.
Урилдаанда түрүүлжэ ерэhэн мориндо соло дуудаха заншал урда галабhаа манда хүрэжэ ерэнхэй, бидэ энэ удаа газар дэлхэйдэ өөрынгөө ээлжээндэ жэлэй туршада зонхилжо байха үүргэтэй буужа ерэhэн Хүлэг Эрдэниин Соло дууданабди: Аhай-ээ…
Заан шэнги бэетэй,
Загаhан шэнги нюргатай,
Шэрэм булад туруутай,
Шэжэр мүнгэн hоёотой.
Жалгын шэнээн амыень
Жарбалзатар татая-аа.
Жаран хоёр шүдыень
Ялалзатар татая-аа.
Харганаата газарые
Харгы гарган ерэгшэ,
Харанхы газарые
Гэрэл татан ерэгшэ,
Хан булад туруутай,
Хажа мүнгэн hоёотой,
Дун сагаан шүдэтэй,
Дунгар-яашал дуутай
Морин эрдэни-ээ!
Аhай-ээ, аhай-ээ!
Аhай-ээ, аhай-ээ!
Сагаалганай наадан Буряад театрай тайзан дээрэ түрүүшын үдэрhөө (январиин 31-hээ) февралиин 16 болотор үргэлжэлхэ.
Шэнэ жэлээр, хүндэтэ нүхэд, Сагаан hараар!
