П.И. Чайковскийн нэрэмжэтэ театрально-хүгжэмэй училищи 1949 ондо дүүргэжэ гараад, республикын Радиокомитедтэ дикторээр, уран зохёолой редактораар хүдэлмэрилөө. Тэрэ үедэ өөрөө шүлэг бэшэжэ, ород хэлэн дээрэһээ зохёолнуудые оршуулжа эхилһэнюм.
1951 ондо Москва хотын М. Горькийн нэрэмжэтэ Литературна институдта ороһон, тэрэнээ 1956 ондо дүүргэһэн байна. Гунгаа Чимитов тэдэ жэлнүүдтэ оршуулга ехээр хэдэг, шүлэг, басни бэшэдэг байгаа. Тэрэ A.С. Пушкинай «Поп болон тэрэнэй хүлһэншэн Балда тухай үльгэр», «Борис Годунов» гэжэ трагеди, Н. В. Гоголиин «Шинель» гэжэ туужа, «Ревизор» гэжэ зүжэг, Максим Горькийн «Дайсад», «Васса Железнова», «Һүүлшынхид» гэжэ зүжэгүүдые, М.А. Шолоховой «Хүнэй хуби заяан» гэжэ туужа, Алексей Недогоновой «Сомон зүблэл дээрэ туг далбана» гэжэ поэмэ, Самуил Маршагай шүлэгүүдые, Сергей Михалковай баснинуудые, Агния Бартогой «Звенигород» гэжэ поэмые, мүн Шота Руставелиин «Барасай арһа хэдэрһэн баатар» гэһэн поэмые оршуулһан байха юм. Оршуулгын ажал хэхынгээ хажуугаар тэрэ өөрынгөө шүлэг, рассказ, очеркнуудые бэшэнэ. «Сэлгеэ Сагаан Түгнэмни» гэһэн шүлэгэй ном, «Колхозой түрүүлэгшэ» гэһэн очеркнууд, «Хулдай мэргэн» гэһэн Даша Черниновтэй хамта бэшэһэн үльгэр, «Таряан» гэһэн суглуулбари хэблэгдэһэн байха юм. Гунгаа Чимитов үхибүүдтэ зорюулжа хэблүүлэгдэһэншүлэг, үльгэр, рассказ, пьесэ болон баснинуудай хорёод номой автор юм.
Республикын композиторнуудтай хамта Гунгаа Чимитов хоёр зуугааддуу бэшэнхэй. Илангаяа «Эгэшэ аха хоёрни», «Инаг дураяа гамнаарай», «Тоонто нютаг» гэһэн дуунуудынь арад зондо мэдээжэ, үргэнөөр дэлгэрэнхэй. СССР-эй Уран зохёолшодой холбооной гэшүүн Гунгаа Гомбоевич Чимитов Россиин соёлой габьяата хүдэлмэрилэгшэ, Буряадай арадай поэт, Буряад Республикын Гүрэнэй шангай лауреат гэһэн үндэр нэрэ зэргэнүүдтэ хүртэнхэй.
Гунгаа Гомбоевичай гэрэлтэ һайхан дурасхаал тэрээнтэй дүтэ харилсажа ябаһан нүхэдэйнь, тэрэниие мэдэхэ хүнүүдэй болон Буряад Республикын арадуудай дунда хэтэ мүнхэдөө үлэхэ.
