Энэ наадан России гүрэн дотор соносхогдоhон Соёлой жэлдэ зорюулагдаба. Тосхоной ажаhуугшад наhанай илгаа үгы барандаа гаража, гудамжануудаараа илгаран, республикын аймаг бүхэнэй ёохор харуулан мүрысэбэ гээшэ. «Олон ондоо яhатанай ажаhуудаг тосхондо хэр угhаа хүршэ hуудаг нүхэдэй найрамдалай зангилаа улам бүхэлжэ, үндэhэн буряад соёлые сахин hэргээхэ зорилготой эмхидхэгдэhэн мүрысөөнэй мүнөө үедэ элбэгээр дэлгэрhэн хүндэ болон ниитэдэ харша ябадалнуудые усадхажа, зоной сэдьхэлдэ hайхан бодолой болон ябадалай үрэhэ тариха хэрэгтэ горитойхон түлхисэ боложо үгэхэнь дамжаггүй» – гэhэн найдалаа элирхэйлжэ энэ мүрысөө эмхидхээ бэлэйбди, мүнөө, энэ мүрысөөнэйнгөө үнгэрөөд байхада найдалнай гүйсэд харюулагдаа гэхэ аргатай болобобди.
Эндэ шалгаржа гарагшадые онсолхо болобол, Юбилейная, Молодёжная гудамжануудай бүлэг, тиихэдэ хоёр гудамжаhаа хамтарhан үшөө нэгэ бүлэг – Гагарина, Спортивная, шангай гурбадахи hуури эзэлээ. Тиихэдэ хоёрдохи hуурида гараhашуул гэхэдэ Кирова, Школьная гудамжануудhаа бүридэhэн бүлэг, нэгэдэхи hуурида – Проезжая, Дамбаева гудамжануудhаа болон Анчиг гэhэн тойрогhоо бүридэhэн бүлэг гараба. Нютагай бүхы хүнүүдэй hонирхол үүсхэhэн энэ мүрысөөнэй Гран-при шагналда Банзаракцаевай гудамжын түлөөлэгшэд хүртэбэ.
Энэ мүрысөөндэ нютагай зон унтаха нойроошье алдаба аа гү гэхээр бэлэдхэлэй горитой ехэ хүдэлмэри үнгэргэжэ, нютагайхидаа ехэ багагүй хүхюу долгин дээрэ эблэрүүлжэ, сэдьхэлыень үргэжэ баярлуулба гээшэ. Мүрысөөнэй үедэ Ивалгын дасанай бурха бүтээдэг уран зурааша Содном Базаров шажанай удхатай хүдэлмэринүүдэйнгээ үзэмжэ дэлгэhэн байха юм.
