Энэ мүрысөөндэ өөрынгөө hанал бодолнуудые «Минии Сагаан hара» гэжэ элирхэйлхэ эрилтэнүүд гурбадахияа табигдажа, эндэ ороhон олон тоото хүдэлмэринүүд сооhоо шэлэжэ абахань тиимэшье бэлэн бэшэ байгаа, гэбэшье дүнгүүд эли боложо тодороол даа.
Сагаан hарада, он жэлэй hэлгэлдээн гэжэ сэгнэжэ, өөрын хандаса харуулха, энэ ушараар буряад арадай эртэ урда сагhаа баримталжа байhан заншал гуримуудые сахиха, залуу үетэндөө дамжуулха зорилго гол эрилтэнүүдэй нэгэн юм бэзэ. Эндэ шэнэ юумэ hанажа байhанай хэрэг үгы, хамаг юумэ тон эли болонхой ха юм даа. Хэлэнэй илгаа үгы соносхогдоhон энэ мүрысөөндэ ороhон хүдэлмэринүүд «Бурятия», «Буряад үнэн» hонинуудай нюурнууд дээрэ толилогдоо бэлэй, ород хэлэн дээрэ эгээл эрхим хүдэлмэри гээд Хойто-Байгалай аймагhаа Буряадай Ехэ hургуулида hурада оюутан Филипп Стефаниин бэшэhэн «Сагаалган – минии бүлын заншалнуудай нэгэн» гэhэн хүдэлмэри тоологдобо. Хоёрдохи hуурида Санкт-Петербург хотода ажаhуудаг, Хурамхаанай аймагай Аргатаhаа гарбалтай Сэсэгма Храмцова (Раднаева), гурбадахи hуурида – оюутан Полина Гнатюк гэгшэд гараа.
Буряад хэлэн дээрэ ороhон хүдэлмэринүүдэй дундаhаа эрхим гэжэ шэлэгдэhэн Хурамхаанай аймагай Бархан нютагhаа буряад заншалнуудай тоодо ородог байhан адуу тамгалалга тухай бэшэhэн Э. Цыреновагай хүдэлмэри нэрлэгдээ. Хоёрдохи шагналда үнгэрhэн ехэ дайнай болон хүдөө ажахын hалбариин ветеран Бимба Пурбуевай бэшэhэн «Дэбжыш дээшээ, хии морин» гэhэн шүлэг, гурбадахи hуурида Кабанскын аймагай Түмэн-Доржо Должитовай Сагаан hара тухай шүлэгүүд нэрлэгдээ.
Эдэ шагналнууд энэ hарын 20-до Хэблэлэй байшан соо барюулагдаха.
