Энэ удаа дэлхэйн буряадуудые Монголой Хэнтэйн аймаг хүлеэжэ абаха ёhотой байhан бэлэй, тиимэhээ тэрэл шиидхэбэриингээ үндэhэ баримталан, «Алтаргана» наадаяа эндээл долоон hарын 25-най үдэр баярай оршондо нээжэ үнгэргэхэ гэhэн шиидхэбэри абтаба гээшэ.
«Алтаргана» нааданай анха удаа эхиеэ абажа дэлгэрhэн Дадал суманда энэ удаа сугларбал гүнзэгы удхатай, сумын болон тэрээ руу аянай хүгжэлтэдэ hайн хойшолонтой байха бэлэй гэжэ эмхидхэлэй хороондо hаналаараа зүришэлдэhэн зон олдожо, энэ асуудал даб дээрээ эсэслэн шиидхэгдэhэн гэхын арагаүй, гэбэшье аймаг нэгэл ха юм даа.
Дадал суманда хүрэжэ ошохонь хүшэр, зам хүүргэ хоёрые шэнэлжэ бариха ехэ хүдэлмэри байна, энэ хэрэгэтэ 1,8 тэрбум (1 миллиард 800 миллион) төгрөг мүнгэ хэрэгтэй болохо, энэ ехэ гаргашые олохонь хүшэр, тиигээдшье Хэнтэй аймагай ниитын ажал ябуулагша М. Пүрэвжавын түрэhөөр 170 жэлэй, Галшар сумын байгуулагдаhаар 90 жэлэй ойн баярнуудай туг доро Хэнтэйдээл үнгэргэхэ гэhэн дурадхалнуудай хажуугаар hайн hайхан үндэhэ баримтатай, ерээдүй үндэртэй дурадхалнууд ороо гэбэл – энээхэн мүнгыень оложо, замаа, хүүргэеэ байгуулаад байхадамнай, гансашье «Алтаргана» нааданда хэрэгтэй болоод үнгэрхэгүй, тиишээ,
Дадал тээшээ Эзэн хаанай нэрэ түрэдэ хабаатай 15 дурасхаалай газарнууд байна, тиишээ аяншалга хүгжөөхэдэ, Дадалда аяншалгын түб байгуулхада таатай боложо үгэхэ бэлэй гэhэн бодолнуудай ороод байхада, энэ жэлэймнай «Алтаргана» наадан лаб лэ хаанань үнгэрхэб гэжэ байн, эли болоhон хойнонь, дэлхэй дүүрэн дэлгэржэ ажаhуудаг баряадуудтаа дуулдаха байха.
