Үлэhэн ошоhон хоёрой уулзалгын буудал – Оперын ордон. Энэ hарын 13-да юрэл «Намжил» гээд нэрлэгдэhэн, урлалай шэнэ түрэл зүйл (новый жанр в искусстве) гэхэ юм гү, магад хаана нэгэ тээ байhаншье юм бэзэ, hонирхолтой үдэшэ үнгэрбэ гээшэ. Намжилай шүлэгүүд ямаршье хүниие илгаагүй абаад орхихо доторой татасатай, ажабайдалай алишье үедэ таараад байха хэмжүүртэй. Намжилай шүлэгүүдhээ hабагшалаад, мүнөө үеын залуу шүлэгшэдэй бодол зүг шэглэлээ оложо ядахагүй, ульhатай халуун үгэнүүд олдоод лэ байдаг, тэрэнэй нэрэмжэтэ уран шүлэгэй мүрысөөнүүд, тэдээндэ хабаадагшад энээниие гэршэлнэ ха юм. Иимэ шүлэгшын үгэнүүдые хатарай хэлээр харуулжа, хэлэжэ болохо гэжэ Санкт-Петербург хотын А. Я. Вагановай нэрэмжэтэ ород хатарай Ехэ hургуулиин эрдэмтэдые бэлдэдэг таhагта hуралсадаг Петр Базарон шиидэжэ, бэелүүлбэ гээшэ. Энэ хадаа манай Буряадай тайзанда шэнэ алхам.
Тэрэ үдэшэ зон олон байгаа, hандалинуудhаа гадуур, танхимай табсангууд дээгүүр дүүрэн hуушанхайнууд, барандаа урлалай эди шэдидэ эзэлэгдэнхэйнүүд, тайзан дээрэ боложо байhан үйлын мэдэрэлдэ сүм орошонхойнууд hуугаа, нулимсаяашье аршажа hуугаашад байба.
Поэдэй эгэшэ Любовь Ширабовна Намжилай олон шүлэгүүдые хэрэгтэй болохо байха гэжэ «тоншожо» асарhан, тэдэ шүлэгүүдыень тайзан дээрэhээ бишыханууд агаарай онгосохонууд болгожо танхим руу табихадань, харагшад айхабтар олзуурхажа абаhан байбад.
Нэгэ үгөөр, гайхалтай hонирхолтой үдэшэ үнгэрөө гэжэ тэмдэглэхэ шухала, тиихэдэ энээнээ харагшадтаа дахин дурадхахагүй юм аа гү гэhэн асуудалнууд бии боложо захалаа.
