Тиихэдэ энэ хүшөө бүтээжэ, заларха газартань хүргэжэ байлгаhан «Лотос» гэhэн хизаарлагдамал харюусалгатай нэгэдэлэй хүсэл оролдолгоор ерээдүйн айхабтар ехэ удха шанартай хэрэг мүнгэ гаргашынгаа талаар түлбэриhөө уридшалан бүтэhэн гэжэ нюуса бэшэ ха юм даа. Хүшөөгөө тойруулан бүтээхэ хүдэлмэри үшөө ехэ, болбосон түхэлтэй болгохо, зоной ашата hайхан эжыгээ эльгэ сэдьхэлдээ шэбшэжэ, hүгэдэн бараалхажа байха газар болоhон энэ хүшөөгөө хүсэндэнь хүргэтэр үшөө ехэхэн ажал байна. Тэрэ болон бусад ехэ гаргашануудай урда орохо зорилготой мэнэ hая, февралиин 21-дэ, Хориин аймагай түб тосхондо аймагай бүхы нютагуудай, аймагhаа гарбалтай хүнүүдэй, республикын Засаг газарай, Арадай Хуралай болон олон тоото эмхи зургаануудай түлөөлгшэдэй хабаадалгатай найрай наадан үнгэрбэ.
Эндэ хабаадаhан Буряадай Правительствын Түрүүлэгшын орлогшо В. Э. Матханов, Хориин аймагhаа Арадай Хуралай депутадууд Г. Д. Гунзынов, В. П. Доржиев, Улаан-Үдэ хотодо ажаhуугша аймагhаа гарбалтан республикын гэгээрэлэй болон эрдэм ухаанай hайд А. В. Дамдинов түрүүтэй хандибай эхи табижа, тэрэ үдэрэй туршада 750 000 гаран түхэриг мүнгөөрөө, тиихэдэ 200 мянга гаран түхэриг тусхайтаар байгуулагдаhан «Хори хатан» гэhэн жасада оруулагдахаар заагдаба. Энэмнай нигүүлэсхы сэдьхэлэй хүдэлөөнэй эхин, ерэхэ апрель hарын тэн багаар Улаан-Үдэ хотодо, Буряад театрай ордон соо газар дэлхэй бүхы Хори гарбалтан сугларжа, арад зоной сэдьхэлдэ hайн hайханай үрэhэ тарижа байха зорилготой арамнайлагдаhан Хори хатанай баяр наада үнгэргэхэ гэhэн шиидхэбэри абанхай.
Аймагай түбтэ болоhон наадан гол талмай дээрээ ехэ ёохороор эхилжэ, удаань үдэрэй хоёрдохи хахадай туршада Соёлой байшан соо үргэлжэлөө.
Энэ ехэ нааданай үедэ тайзан дээрэ Хориин аймагай түүхэдэ хубитаяа оруулhан алдар солото эхэнэрнүүд, олон хүүгэдые үргэжэ ажабайдалай аянда табиhан эжынэр үндэр нэрэеэ нэрлүүлжэ, хүндэ ямбада хүртэбэ, тиигэжэ олоной хэлэhэн үгэнүүдые тон хуряангыгаар эблүүлжэ хэлэхэдэ, Хори хатан хүшөөмнай нээрээл энхэргэн эхын жаргалда гэжэ табигдаhан үшөө нэгэ үндэр, hайхан удхатай байба.
