– Энэ Плюшэнхэ гэжэ хүбүүн нюргандаа дүрбэн шүрэб мушхуулжархёод, мүльһэн дээрэ амаргүй фигурэнүүды хэжэ, алтан медальда хүртэһэн аад, баһа дахин һанаатай, дэбхэржэ байтараа, нэгэ шүрэбэһэниинь хуха һүрөөд, хатаржа шадахаа болёо. Бэеэ гамнаха гэжэ мэдэхэгүй, ямар амитан гээшэб. Халагни халаг, бэе тамир һайтай залуу хүбүү орондонь табиха арга байгаагүй юм гү, медальда хүртөөшьегүй һаа, олимпиин опыттай болохо байгаа гүбэ, – гэжэ Ханда абгай эхилбэ.
– Энэ 13 алтан медальнуудай гурбыень хари гүрэнһөө ерэһэн хорей хүбүүн Ан, нэгыень америхаан хүбүүн Байлд абаал ха, шорт-трек сноубордо хоёроор. Ганса хари гүрэндэ наададаг наадан юм гү, манайхид юундэ биранагүйб.
Тиихэдэнь би илгаржа гараһан манай фигуристнүүдэй, биатлонистнуудай, санаар, шаргаар, конькиигоор диилэгшэдэй нэрэнүүдые нэрлэжэ мэдээб. Теэд хүгшэн эжые "голыми руками не возьмешь".
– Тэрэ хёорлинго-мёорлинго гээшээр юугээ ядааб манайхид. Мүльһэн дээгүүр монсогор шулуу эрэньш, эмэньш түлхижэ шадаагүй, шүдхэрнүүд, – гэжэ байжа хүгшөөдэй намда добтолбо.
– Трамплинһаа һүрэжэ юундэ ядааб, манай гүрэндэ саһан дүүрэн, хада шулуунш барагдаа һэн гү... Хоккеэгоошье мүртэй наадажа шадахаа болёо, хуу хари гүрэнөөр байдаг, тэндэ наададаг Овечкин, Малкин, Ковальчуг, Дасууг гэхэ мэтэ зониие табихадань, тэдэнь бэеэ хараад лэ, команда боложо шадаагүй...
Тиигэжэ байжа хүршынгөө гэмэрхэдэ, ямар шанга, һүбэлгэн хүгшэн гээшэб гэжэ ойлгобоб. Хэлэһэн юумэниинь бодожо үзэхэдэ, яһала зүб хэбэртэй. Харин би, үшөө нэмэжэ хэлэхэдэ, пари нааданда хони алдаһанаа хөөрэхэ гэнэб. Барнаул хотодо манай Хяагтаһаа, Үбэр-Хэрээтэһээ гарбалтай, Борис Иванович Кривогорницын гэжэ нүхэрни ажаһуудаг. Гушаад жэлэй саана хамта Буряадай хүдөө ажахын эрдэм шэнжэлэлгын инститүүдтэ хүдэлжэ, хожомынь дүтын нүхэд болоһон зомди. Олимпиадын эхилһээр эгээл недели болоод байхада телефоноор хөөрэлдэхэдөө, манай команда 1-дэхи һуурида гараха гэхэдэнь, би 3-дахи болоол һаа болоо гэжэ арсааб. "Давай поспорим!" гэхэдэнь, "На барана!" гэжэрхёоб. Всё, хонин ябаа! Хоть Алтайн хизаар абаашахагүймни ха, үсэгэлдэр бэшэг бэшэхэдээ, 75 наһаяа тэмдэглэхэеэ 2015 оной июль һарада ерэхэдэтнай, хонин яһала таргалаад байха, гээб. Энэмнай селекци хэжэ хара талханай, обёсой олохон шэнэ сорто гаргаһан, нэрэтэй солотой хүн. Тиимэһээ хони алдаһандаа баяртайб.
Үшөө нэгэ аймшагтай һонин ушар болоо. Минии дүтын танил Вера гэжэ басаган, сэбэрхэн, залуушье гээ һаа залуу, "неопределенного возраста," гэел даа, Хори тосхондо ажаһуудаг. Манай фигуристкын Олимпиин чемпион болоходо ехээр баярлаад, хори-гушан жэлэй саана үмдэжэ ябаһан конькиигоо гаргажа, Үдэ голой мүльһэн дээрэ гаража, би Аделина гээшэб гэжэ байжа дэбхэрhээр хальтиржа унаад, гараа хухараад, гипсэ хүүлээд, мүнөө үдэрнүүдтэ гэртээ байна. Ошодог һаа...
http://garmaev53.blogspot.ru/2014/02/blog-post.html
