«Байгал» театрай хэдэн олон жэлнүүдэй хугасаа соо буряад арадай нюур боложо, торгон утаhа сагhаа сагта таhалангүй татажа, буряад зондоо элинсэгээ мартахагүйень үргэлжэ hануулжа байдагые минии олон үгэ үгыгөөршье мэдэнэт... Гурбадугаар hарын арбан долоондо мэдээжэ дуушадай бэлигэй дуу хүгжэмэй угалза гүрэхые Буряад театрай тайзан хүлеэнэ. «Амаралтын үдэшэ» гэhэн проект арад зонойнгоо омогорхол боложо ябаhан бэлигтэй дуушадые жэл бүри уридаг юм. Һүүлшын айлшад: Бадма-Ханда Аюшеева, Намгар Лхасаранова гэhэн дуушаднай холоhоо ерэжэ, харагшадтайгаа ажабайдалаа хөөрэлдэжэ, үни заяанай мэдээжэ, шэнэшье дуунуудаа дуулажа, бидэниие баярлуулhан байна.
Буряад дуунай хүгжэлтэ, хубилалтые хараха аргатай байнат. Гурбан ондоо үеын арадтаа мэдээжэ дуушад таниие хүлеэнэ: алдартай суутай, манай театрай ветеранууд Буда-Ханда Дашиева, Хажидма Аюржанаева, Дарима Дугданова, тиихэдэ мүнөө үеын арадай дуушад Сэдэб Банчикова, Цыпилма Аюшеева, Буряадай габьяата артистнар Сэсэгма Сандипова, Болот Сандипов, Галина Бадлуева. Гурбадахи долгин гэбэл, «Байгал» театрай залуу дуушад: Бүтидэй Дондог-Сэрэн, Болдын Ган-Цэцэг, Алдар Дашиев, Аюна Баирова, Гэрэлма Жалсанова. Нэрлэгдэhэн дуушаднай репертуар баянтай, арад зондоо мэдээжэ, хүндэтэй артистнар гээшэ ааб даа. Зай, иигээд лэ, бэлигтэй душадайнгаа зүрхэнhөө гаргаhан аялга дуу үзэхэ шагнахаяа ерээрэйт!
