«Буряад-монгол арадайнгаа эдир үетэндэ зорюулан бүтээһэн тус дискмнай үргэн дэлисэтэйгээр олон түмэндэ хүртэжэ, хүүгэдэй мэдэрэлые далижуулан, эхэ хэлэеэ шудалжа, би буряад хүнби гэжэ омогорхон, орон нютагаа, эхэ байгаалияа хайрлажа, сэгнэжэ һурахадань туһа болог» гэжэ проектые һанаашалан хүтэлбэрилһэн Жанна Дымчикова дискын хэблэгдэхэдэ хэлээ бэлэй.
«Буурал хангай дайдымнай сахюусад бурхад, буурашагүй һүлдэтэ араднай хөөрхэн жаахан хүүгэдэйнгээ хүгжэм дууе соносожо баясан, шэг шарайгаа сэлмээжэ, сэдьхэл бодолоор тэнииг лэ. Тусхайлан хэлэбэл, манай зохёохы бүлэгэй гэшүүн бүхэн: уран шүлэгшэн гү, хүгжэм зохёогшо гү, багша гү, али аранжировко хэгшэд гү – бултадаа энэ ажалаа үнэн сэдьхэлһээ оролдожо бүтээгээ. Багашуулнай эхэ нютагайнгаа нэрэ хүндыень үргэжэ, һалбаран хүгжэхэ хэрэгтэнь туһа нэмэриеэ оруулха, хаанашье арад түмэнөө түлөөлхэ шадалтай түгэлдэр баатарлиг зон болоһой гэжэ үреэн этигэнэбди. Хүхюун, дорюун буряад-монгол хүүгэдэй аялга дуунууд бүмбэрсэг дэлхэйдэ хэзээдэшье зэдэлэг лэ!» – гэжэ эдир дуушадай бүлэгые хүтэлбэрилэгшэ Сэсэгма Ринчинова, дуунуудай бэшэлгые студидэ ударидагша Сарантуяа Жалцанова болон абяа найруулагша Николай Силин гэгшэдэй шагнагшадтаа хандалга соо уншанабди.
Хүүгэдэй дуунай дискдэ хүгжэмшэд Г. Баттулга, Н. Нар-Оюу, М. Дамиранов, Б. Наранбаатар, В. Пантаев, Баир Батодоржиев, С. Жалцанова, Р. Балдандашиев, Д. Дымбрылов, Э. Цымпилов болон Д-Д. Жалсараев гэгшэдэй Ц-Х. Дарибазарова, Нина Артугаева, Ц-Д. Дондогой, Ц-Б. Бадмаев, Г. Чимитов, Л. Эрдэнцэцэг, Д. Балдан, Жан Зимин болон Басаа Валера гэшэдэй үгэнүүд дээрэ бэшэhэн дуунууд ороо.
Дискын хэблэгдэжэ гараhанhаа хойшо мүнөө хүрэтэр хүүгэднай энэ үдэрөө хүлеэгээд hуугаагүй, хото соогуур эндэ тэндэ үнгэржэ байhан ехэ бага концерт-наадануудта хабаадалсажал байгаа. Тиигэжэ Буряадай Правительствын Оперын ордон соо үнгэргэhэн Сагаалганда, республикын хэмжээнэй «Хүхюу буряад» гэhэн хоёрдохи мүрысөөндэ хабаадалсаа, ябаhан лэ газартаа дуулажал ябанад гээшэ.
Энэ ажалые түлэблэл дэмжэгшэд гэхэдэ Тимур Гомбожапович Цыбиков –Буряад Республикын соёлой яаманай сайд, Цыренов Баяр Дашиевич – ИФК «Метрополь» хамтаралай можо, нютагуудтай ажал ябуулгын талаар захирал, Бадмаева Любовь Владимировна – «Интерактивна Буряад орон» гэһэн ООО-гой захирал.
Одоолшье концерт-нааданай үдэр элиржэ тунхаглагдаа, мартын 14-дэ, үдэшын 5 сагта филармони соо концерт болохоо байна, ерэгты, хүндэтэ нүхэд, уринабди! Хүүгэдээ дэмжэел!
Нааданда орохо үнэ 300, 400, 500 түхэригтэ байха. Концертдэ оперын дуушан Ольга Жигмитова, Наранбаатарай Нар-Оюу, Сарантуяа Жалцанова, Галмандахын Баттулга гэгшэд хабаадаха.
