Шанартай hайнаар бүтээгдэhэн бүтээл гээшэ хэзээдэшье ута наhатай, олоной дура сэдьхэл эзэлдэг гэжэ мэдээжэ.
– Хүүгэдэй «Би томо болооб» гэhэн дискын нара hараhан ушараар дэлгэгдэhэн концерт үнгэрбэ. Хүүгэд маанар харагшадые баярлуулжа шадабал даа. Бүхы юумэ дээдэ хэмжээндэ, гэбэшье тушаалта нюурнууд болон ниитын ажал ябуулагшадай энэ ехэ хэрэгтэ, түрэл буряад хэлэндээ анхаралаа табижа байhан анхарагдабагүй, энэл голхоролтой байба. Энэ түлэб hанаашалан байгуулhан бүхы зохёохы ажалтанда тэдэнэй ударидагша Жанна Дымчиковагай нюураар баяр хүргэнэб – гэжэ энэ түлэб дэмжэгшэдэй нэгэн, ИФК «Метрополь» хамтаралай можо, нютагуудтай ажал ябуулгын талаар захирал, Буряад Республикын Арадай Хуралай депутат Баяр Дашиевич Цыренов фэйсбук соохи өөрынгөө нюурта бэшэнэ.
Һүүлэй хоёр-гурбан жэлнүүдэй туршада нэгэ амяар амилжа, оролдосын hайгаар hанал түлэбөө дабажа гараhан Хүүгэдэй хүгжэмэй 8-дахи hургуулиин багша Сэсэгма Ринчинова, дуунуудай авторнууд барандаа сугларжа шадаашьегүй hаа, тэдэнэй зариман – Г. Баттулга, Басаа Валера, Нина Артугаева гэгшэд энэ үдэшэдэ хабаадалсажа, баяртай харагшадай магтаалда хүртэбэ ха юм. Дуунуудые бэшэлгэдэ газар дэлхэйн хоёр талаhаа сугларжа, зарим ушарта тэндээшье байгаад гэхээр эдэбхитэй хабаадалсаhан Нар Сар (Наран, Һара) хоёрой габьяа айхабтар ехэ бэзэ даа, нэгэниинь Бээжэн хотодо, нүгөөдэнь Москва хотодо ажалтай, ажаhуудаг зон юм – Сарантуяа Жалцанова, Наранбаатарай Нар-Оюу. Мүнөө энэ дискынгээ нара харалгын баярта аянай холо гэнгүй айлшалжа бууhан бэлигтэй хоёрнай хоюулан Ленинград хотодо түрэhэн, хоюулан Улаан-Үдэдөө нэгэ доро нэгэ багшада (А. Ким) заалгаhан, энэ үдэшэдөө харагшадтаа бэлэг дуугаа хоюулан гаража тайзан дээрэhээ барибад. Хойноhоомнай иимэ бэлигтэй залуу hүрэг ургажа ябана гэжэ харахадаа, буряад арадай хамагайнгаа түлөө оролдосо миин газар хаягдахагүй, залуу hүрэгнайш найдамтай гарта гэhэн бодол ороно бэзэ? Тиимэл даа.
Хүүгэдэй наада дэмжэжэ Дуурь бүжэгымнай театрай дуушан Ольга Жигмитова тайзан дээрэhээ шэнэ дуу дуулажа, багашуулай хэрэг баранаймнай гэhэн мэдэрэлыемнай дэмжэбэ, гоёл даа, хүүгэднай иигэжэл ургаха ёhотой ха юм.
Иигээд лэ, байд гээд лэ эндэ тэндэ «Мүнгэн хонхонууд» дуулана гэхэнь саг үргэлжэ дуулдажа байхань болтогой!
