Байд гээд лэ амаралтын үдэшэ арад зоноо суглуулжа, хатар дуунуудаа дэлгэжэ байхадань дуратай харагшад олоороо сугларжа, оролдоhон ашыень харюулан дэмжэжэ байхань зохид лэ байн даа. Энэ hарын 15-да үнгэрhэн амаралтын үдэшые «Байгал» театртай үнгэргэхэ зол дайралдажа, тэндэ орхиhон хоёр сагаа оройдоошье шаналаагүйб. Театрта бии боложо байhан залуу hүрэгые үргэн дэмжэжэ, дүршэлтэй томо артистнартай суг тайзан дээрэ урин гаргажа, халуун альга ташалган доро бэлигыень онсолон харуулжа байхадань, тэдэнэй хии морин яабашье дээгүүр лэ дүүлижэ байна гэжэ эли, тиигээдшье бүхы наhаараа театртаа дуулажа, хатаржа ябаад, харагшадтаа намтарайнгаа хэлтэрхэйешье мэдүүлээгүй артистнар байха. Энэ үдэшын концерт хүтэлэгшэд Гэрэлмаа Жалсанова Жаргал Бадмаев хоёр ульгам жороо хэлэн дээрэ танилсуулжа, хаража hуугшадай болон тайзан дээрэ байгшадай хоорондо харагдашагүй утаhаар холбоон байгуулагдажа, үдэшын туршада нэгэ амин болонхой байдал тогтоно…
Буряад арадай дуунай домог болоhон Буда-Ханда Дашиева Зэдын аймагhаа, алдартай суутай Дугаржаб Дашиевай тоонтоhоо гарбалтай залуу дуушан Алдар Дашиевтай, Буряадай арадай артист Цыпилма Аюшеева Хэнтэйн аймагай Баяндун сумаhаа буряад гарбалтай залуу дуушан Болдын Ганцэцэгтэй, Россиин габьяата артист Хажидма Аюржанаева Захааминай аймагай Хамни тосхонhоо гарбалтай залуу дуушан Оюна Баироватай, Россиин габьяата артист Дарима Дугданова Шэнэхээн тоонтотой дуушан Бүтидэй Дондог-Сэрэнтэй, тэдэнэй намтарhаа хэды тэдыгээр ойлгуулан гарахадань шагнажа hууhан зондо яhала зохид болоно. Буряадай габьяата артистнар Болод, Сэсэгма Сандиповтан, Галина Бадлуева, Буряадай арадай артист Сэдэб Банчикова гэгшэдэй тайзан тээшэ мүрлэhэн зүргын эхиндэ хүрэжэ ошообди, юрэдөө ехэл hонирхолтой, ёhотойл амаралтын үдэшэ болобо гэжэ онсолхо шухала. «Байгал» театрнай hонин арга hанаа юм байна, иигэжэ байд гээд лэ харагшадтайгаа «Амаралтынгаа үдэшэдэ» уулзажа байха түсэбтэй, хүндэтэ харагшад, нээрээ hонин лэ, ерэгты, харагты, амархат.
