Аймагhаа гарбалтан айхабтар олоороо суглараад, хүүежэ уулзажа, хэдэн удаанай харалсаа уулзаагүй зон уулзан, бахархан хөөрэлдэхэ арга олоhондоо олзуурхан, шарай сэлмэг харагданад. Республикын сэхээтэнэй дунда үнинэй мэдээжэ болоhон залуу шүлэг, дуу бэшэгшэ, өөрөө уян гоёор гүйсэдхэхэ бэлигтэй Сэсэг Бадмаева энэ ехэ хэрэгтэ үүсхэл гаргажа, аймаг тухайгаа «Сайхан Зэдэ нютагнай» гэжэ шэнэ дуунай үгэнүүдые бэшээд, тэрэнь монгол хүгжэмшэн, Баттүвшинэй аба Гуенгийн Балданцэрэн гуайн найруулhан хүгжэмөөр ехэ зохидхон, шагнамаар аятайхан дуун боложо тайзан дээрэhээ зэдэлбэ.
Энэ үдэшэдэ Улаан-Үдын театрнууд болон дуу хүгжэмэй байгуулгануудта ажалтай Зэдэhээ гарбалтан гэбэл оперын театрай дуушад Эдуард Жагбаев, Сэсэг Санданова, Буряад театрай зүжэгшэд Любовь Цыдыпова, Ольга Ранжилова, Дашанима Доржиев, Сэсэг Аюшеева, хүүхэлдэйн «Үльгэр» театрай уран hайханай хүтэлбэрилэгшэ, энэ үдэшые найруулагша Эрдэни Жалцанов, «Байгал» театрай артистнар Болод, Сэсэг Сандиповтан, Булад Цыбиков, Валентина Жаргалова, Лариса Шаралдаева, Чагдар Будаев, Евгений Чойдонов, Дарима Цыренова, Ч. Павловай нэрэмжэтэ урлалай hургуулиин багша Алдар Дашиев, «Тэмүүжэн» бүлгэмэй дуушад Чингис Иванов, Солбон Лубсанов, Батор Уханаев, циркын артистнар Татьяна Дугарова, Аяна Намжилова болон бусад эрмэлзэл оролдолгоор хатар дуунай, хүгжэмэй үдэшэ үнгэрөө. Тиихэдэ аймагhаа гарбалтай бэлигтэн, Москвагай К. Станиславский болон В. Немирович-Данченкын нэрэмжэтэ хүгжэмтэ театрай дуушан Чингис Аюшеев Елена нүхэртэеэ хабаадалсажа, нютагайхидайнгаа hайхан үүсхэл дэмжэлсээ, танхим соо хаража hууhан нютагайхидаа баярлуулаа. Иимэл байхал даа, үнэн hайхан сэдьхэлhээ үүсхэhэн хэрэг хэзээдэшье дэмбэрэлтэй, үндэр ехэ үүргэтэй байдаг. «Түрэл дайдынгаа үндэр нэрые үргэжэ бүтээhэн дуунуудайнгаа сахим суглуулбари хэблүүлэн гаргахадамни эбээн тэдхэжэ туhа хүргэhэн Нимажаб ламада (Илюхинов), Санжайжаб ламада, Буряад Республикын Арадай Хуралай депутат Виктор Мункожапович Абушеевта, олзын хэрэг эрхилэгшэ Анатолий Фёдорович Заболоцкийда, аймагайнгаа Захиргаанай толгойлогшо Валерий Ринчиндоржиевич Цыреновтэ үнэн сэдьхэлэй баяр хүргэнэб!» – гэжэ энэ ехэ проектын, бүхы хүдэлмэриин автор, эбээн тэдхэгшэдтэй үгэ хүүрээ ойлголсожо, тэдээнэй зүгhөө дэмжэлгэ олоhон Сэсэг Бадмаева согсолбориингоо хабтаhан дээрэ бэшэhэн байна. Иимэ хэрэг дэмжэhэн зон хэзээдэшье юрөөлтэй буянтай hуухал даа.
САЙХАН ЗЭДЭ НЮТАГНАЙ
Хүгжэмынь Гүенгийн Балданцэрэнэй
Үгэнүүдынь Сэсэг Бадмаевагай
Амтан тунгалаг агаартай,
Алтан таряан талатай,
Хангал ногооны үнэртэй
Хонгор тоонто дайдамнай.
Сайхан Зэдэ тоонтоёо
Цэгнэн, дуулан магтая!
Сайхан Зэдэ тоонтоёо
Сэдьхэн, гамнаж явая даа!
Ара, хангайхан тайгатай,
Аршаан – домтой булагтай,
Талаар дүүрэн адуу малтай
Түрсэн тоонто дайдамнай.
Сайхан Зэдэ тоонтоёо
Цэгнэн, дуулан магтая!
Сайхан Зэдэ тоонтоёо
Сэдьхэн, гамнаж явая даа!
Талаар баян Зэдэмнай
Талаан, золтой байгаасай!
Үндэр солоо дуудажа,
Үнэр баян суугаасай!
Сайхан Зэдэ тоонтоёо
Цэгнэн, дуулан магтая!
Сайхан Зэдэ тоонтоёо
Сэдьхэн, гамнаж явая даа!
Цэцэн, саруулаараа алдартай,
«Сартуул» нэрээ үргэн явыш даа!
Цэвэр сэдьхэл, санаа бодолтой,
«Сайхан» жаргалд зорин явыш даа!
Сайхан Зэдэ тоонтоёо
Цэгнэн, дуулан магтая!
Сайхан Зэдэ тоонтоёо
Сэдьхэн, гамнаж явая даа!
Сайхан тоонто Зэдэеэ…
