- Эрхүүгэй буряадуудай хайшан гэжэ, мүн хаанаһаа һамга хулуудаг байһан тухай мэдээжэ сэтгүүлшэн Александр Махачкеев хүн зонһоо һурагшалхаһаа гадна, ном һударшье шэнжэлбэ.
- Шэнэхээн нютагта жэл бүри тэмээдэй урилдаан болодог. “Байгша ондо тус найр эгээл хүйтэн үдэрнүүдтэ тудабашье, Бээжэнһээ эхилээд, элдэб олон газарай гэрэл-зураг буулгагшад ба Баян-Нуур, Шэлын-Гол аймагуудһаа, Шэнэ-Барга Зүүн хушуунһаа тэмээшэд, барилдаашад, һуршад морилоо, үзэгшэ һонирхогшодшье хэдэн зуугаадаар суглараа”, - гээд, манай сэтгүүлэй тусхай сурбалжалагша Намнан-Доржын Сэмжэд бэшэнэ.
- “...Сэрэн хүбүүнэй гэртээ хүрэжэ ерэхэдэ - хон-жэн, хэншье, юуншье үгы. Түрэлхидһөө, хүршэнэрһөө һурагшалхадань, гэр бүлэнь Монгол зөөжэ ябашаһан байба”, - гээд, Агын тойрогой Дулдаргын аймагай Дээдэ-Элеэ нютагһаа гарбалтай Дамдинай Сэрэн ахатан тухай зураглал эхилнэ. Энэ хүмнай гэртэхинэйнгээ хойноһоо ошохо гээд, хэдэн һарын туршада хилэ зубшажа ябаад, нэгэ соорхойгоор гаража, аба, эжыгээ олоһон намтартай.
- Жаргалсайханай Чингис: ”Абынгаа бурхандаа ошоһоной удаа жэл болоод байхада, тэрэл үдэрынь басагатай болоходоо, абамни эрьежэ түрэбэ гэжэ ойлгоо һэмби”.
- Агын тойрогой Согто-Хангил нютагта бодхоогдохо гэжэ байһан субаргануудые Далай ламаһаа эхилээд, дэлхэйн буддын шажанай бусадшье түрүүшүүл дэмжэжэ, нангин зүйлнүүдые дамжуулһан тухайнь юрэ бусын ушарнуудые Жигжит лама дурдана.
- Буряад эхэнэрэй үүргэ тухай мэдээжэ психолог Татьяна Сенгеевагай бодомжолгонууд; кино болон театрай зүжэгшэн, дуушан, хүгжэмшэн Виктор Жалсановай “уршагта” ябадалнууд; Түнхэнэй аймагай Хойто-Гол нютагта болоһон “Алтан мундарга” гэжэ ехэ наадан тухай; үхибүүндээ хайшан гэжэ нэрэ үгэхэб; Буряад зоной омогорхол болоһон одото дуушад “Минии Буряад” сэтгүүлэй нара хараһан тухай – эдэ болон бусадшье һонирхолтой мэдээнүүд шэнэ дуугартамнай дурадхагдаба.
Сэтгүүлэйнгээ түрүүшын дугаар бүтээхэдээ, имагтал өөһэдынгөө үнинэй һонирхоһон асуудалнуудые бодхоогоо бэлэйбди. Мүнөө удаадахииень гаргахадаа, үнгэрэгшэ энээхэн нэгэ, хоёр һара соо багаханшье һаа, дүршэл олоһоноо мэдэрнэбди. Мүн “Минии Буряадай” шэнэ дугаар гартаа барижа, танилсажа үрдиһэн зоншье ургаһыемнай тэмдэглэнэ. Эрхим уншагша Таанадаймнайшье һанамжа, дурадхал бидэндэ сэнтэй. Та бүгэдэниие Каландаришвили, 23 гэһэн хаягаар 57-дохи таһалгада гү, али 21-64-40, 31-61-81 гү, али 8-983-5-31-61-81 гэһэн утаһаар хүлеэн абахабди.
