Энэ ансамбль үнгэрhэн жэлэй июль hарын эсэстэ Ага нютаг түрүүшынхеэ ошожо, концерт-наадаяа бэлэглэhэн байна.
Энэ ансамблиин уран hайханай хүтэлбэрилэгшэ Буряад Республикын ба Монголой соелой габьяата хүдэлмэрилэгшэ гэhэн нэрэ зэргэнүүдтэ хүртэhэн Баира Цыдыповна Аюрова Табтаанай нютагhаа гарбалтай. Тус ансамбльда ха-баададаг хатаршадые нэрлэбэл, Агын аймагай Базар Анудариев, Бальжима Дариева, Дарима Гончикова, Ирина Дамдинова, Надежда Юмова, Билигма Аюшиева, Могойтын аймагай Баира Базарова, Буянто Батомункуев гэгшэд үндэhэн соелдоо эльгэлhэн залуушуул юм. Тэдэнэр Агын, Түнхэнэй, Шэнэхээнэй, Алайрай, Зүлхэ мүрэнэй адагта ажаhуудаг (качугай) ба сонгоол буряадуудай еохор наада хатаржа, сугларагшадые хужарлуулаа. Ансамблиин гол дуушан Болот Цындымеев нютагайхидтаа мүнөө үеын дуунуудые бэлэглээ. Тэрэ буряад, ород, итальян, испан, англи хэлэнүүд дээрэ дуунуудые гүйсэдхэдэг юм. Тэрэнэй эгэшэ Байгалай Гүрэнэй университедэй 5-дахи курсын оюутан, ансамблиин ажалда эдэбхитэй хабаадалсадаг Баира Цындымеева иигэжэ хөөрэбэ: «Манай ансамбль 2014 ондо 10 жэлэйнгээ ойн баярые тэмдэглэхэеэ байна. Энэ hайндэртэ зорюулжа, ехэ концерт-наада бэлдэжэ байнабди. Мүнөө 70 хүн ансамблиин бүридэлдэ ородог, олонхинь Агын хүбүүд, басагад. Тэдэнэр Эрхүүгэй ба Байгалай Гүрэнэй университедүүдэй оюутад юм. Уран hайханай хүтэлбэрилэгшэ Б. Аюрова сүлөө забдагүй ажаллажа байна. Yшөө Эрхүүгэй соелой колледждо буряад хэлэнэй хэшээлнүүдые үнгэргэдэг. Буряадайнгаа еhо заншал, соел, хэлэн гээшые мартажа огто болохогүй, буряадаараа hайнаар хөөрэлдэжэ байгты, буряад hайхан хубсаhаяа үмдэгты гэхэ мэтэ захяа заабарияа маанадта дамжуулжал байдаг. Тэрэнэй тон түрүүн анхаржа байhан хэрэг гэхэдэ үндэhэн соелоо дэмжэхэ, хүгжөөхэ, дэлгэрүүлхэ ажал болоно». Тэрэ жэлдэ «Улаалзай» ансамбль Франци ошожо, фестивальда хабаадажа ерээ. Алленж хотодо «Легенда о небесной деве-лебеди», «Омулевая бочка», «Рождение Булагата» гэhэн хүгжэмтэ зүжэгүүдые харуулаа. Энэ ансамблиин шагнал хайрануудыень тоолоходо, «Ердынские игры – 2005» регион хоорондын этнокультурын, Бүгэдэ Буряадай уласхоорондын «Алтаргана» нааданай, «Престиж - 2012» гэhэн залуу балетместернүүдэй, Кипр гүрэндэ фольклорой хатарай ба хубсаhанай, «Охридские волны» (Македони) улас-хоорондын хатарай бүлгэмэй г.м. олон фестивальнуудта амжалтануудые туйлаhан юм. Литва гүрэндэ эмхидхэгдэhэн Россиин үдэртэ хабаадажа, hайшаал магтаалда хүртөө бэлэй. А.Вампиловай нэрэмжэтэ эдир харагшадай театртай «Легенды седого Байкала», тиихэдэ «Эрын гурбан наадан» гэhэн найруулгануудые суг табижа, зохеохы ажалайнгаа шэнэ шатада гараhан ансамбль юм. Б. Аюрова «Хореографическое творчество» номинацяар Эрхүү можын Губернаторай шанда хүртөө бэлэй, буряад хубсаhанай тусхай программануудые зохеожо, субсиди абаhан байна. Тэрэ Табтаанайн дунда hургуулида hураха үедөө мэдээжэ хатар найруулагша, багша Владимир Жамсарановай шаби ябаhан тула хатар нааданда дуратай, бэрхэ болоhон байгаа. Эрхүүгэй Гүрэнэй университедэй биологи-химиин факультет улаан дипломтойгоор дүүргэжэ, геологиин ба минералогиин институдта хүдэлhэн. Эрхүү хотодо «Аянга» гэжэ фольклорно бүлгэм 1999 ондо эмхидхэлсээ.
