Эгэршэгүй саг… Эндэл hаяхан телефон, гаджет гэhэн абтаhан үгэнүүдтэй танилшье бэшэ, саарhан дээрэ хандалга, hаналаа ба амаршалгаяа эльгээжэ байhанаа, мүнөө болоходо, юумэн хуу компьютерай мэдэлэй болошоод байна ха юм даа. Гансал мэдэрэл, сэдьхэл, арад зон гээшэмнай үнэхөөрөөшье үнэтэ юумэнүүд гээшэл даа гэжэ минии бодол.
Аялга дуун хүниие мансытай байхаhаань хойшо дахадаг. Хүн гээшэ үбhэ, таряандаашье ябахадаа хамагай дуратай дуугаа талаар тараан дуулажа ябадаг, дуунhаа баярладаг, уярдаг юм. Табяад жэлэй саана «Баян талын аялга» гэhэн проектые эмхидхэгшэ Буряадай гүрэнэй радио бэлэй. Эндэ Владимир Лубсанов, Даша Самбацыренов, Мария Балсаева болон бусад үндэhэ табигшадые нэрлэхэ хэрэгтэй. 20 жэлэй хугасаа соо ехэ ажал ябуулжа байhан редактор Наталья Сультимова байгаа. Саашань нэрлэхэ болоо hаа, БаторЦыбеновэй хоолой хүн бүхэн гэрэйнгээ радиогоор долоон үдэрэй нэгэ удаа, 50 жэлэй туршада таhалгаряагүй шагнажа байна. Буряадай гүрэнэй радиогой агаарай долгиндо гарадаг радиожурнал республика дотороо ехэ мэдээжэ, арад зоной дуратай дамжуулга ха юм. Мүнөө үедэ радиогоор амаршалгаяа захиха бэшэ, харин арбан табан жэлэй хугасаа соо, сэнхир экранда концерт наадан дамжуулгагдадаг болоhон байна. «Баян талын аялга» гэhэн радиожурналай концертдэ шагнагшад, мүн манай харагшад эртээнhээ амаршалгын захил хэжэ, түрэлхидөө, хани нүхэдөө амаршалха аргатай. Тэрэнэй айлшад гэхэдэ, үйлэдбэриин, хүдөө ажахын мэндэ байхада тэрэнэй түрүү ажалшад байгаа, мэдээжэ зон, нютагуудай, хотын ажаhуугшад болоно.
Апрелиин хорин нэгэндэ Опера ба баледай театрай тайзан дээрэ Буряадай гүрэнэй телерадиокомпани, гүрэнэй дуун болон хатарай «Байгал» театртай хамта уран hайханай, хүгжэм дуута «Баян талын аялга» гэhэн радиожурналаа дамжуулхань. Үнгэрэгшэ могой жэлдэ болоhон концерт Буряадай радиогой байгуулагдаhаар 80 жэлэй ойдо, тиихэдэ Буряадай телевидениин 50 жэлэй ойн баярта энэ зорюулагдаhан байгаа. Ерэхэеэ байhан энэ үдэшэдэ ирагуу hайхан буряад дуунуудаа мэдээжэ дуушад Галина Шойдагбаева, Михаил Елбонов, Лариса Егорова гэhэн үни заяанай арад зонойнгоо сэдьхэл эзэлhэн Россин арадай артистнар, Буряадай арадай артист Билигма Ринчинова, тиихэдэ мэдээжэ бэлигтэй залуу дуушад: Болдын Ган-Цэцэг, Чингис Раднаев үшөө тиихэдэ «Байгал» театрай ба Оперо баледай театрай бэлигтэй дуушад болон бусад дуулахаяа байна. Чингис Павловай нэрэмжэтэ буряад арадай инструментнуудэй оркестр турэл арадайнгаа хугжэм бэлэглэхэ.
21-41-84 гэhэн утаhаар Буряадай радио хонходожо, амаршалгын захил хэхэ, түрэл нүхэдөө, эжы абаяа, үбгэд хүгшэдөө hайн үдэрөөрнь амаршалха аргатай байнат. Тодорхой мэдээсэл абахаа hанабалтнай 21-30-22 гэhэн утаhаар хүлеэжэ байхабди.
