Хэд бэ гэбэл:
- үнжэгэн нимгэн сэдьхэлтэй, оройдоол 34 наhандаа энэ дэлхэйтэй хахасаhан бэлиг ехэтэй багша, адли тэгшэ уран зохёолшо, уран зурааша Ким Шогдопович Цыденов;
- республикын Николай Семашкын нэрэмжэтэ эмнэлгын түб байшангай пульмонологическэ түбэй таhагые даагша, Россиин Эмнэлгын Академиин Сибиириин Таhагай физиологиин ба аминай институдай Буряадай таhаг байгуулагша, Буряадай болон Россиин габьяата эмшэн Аюр-Жана Базарович Раднаев;
- уран зохёолшо, СССР-эй уран зохёолшодой холбооной хүтэлбэриин гэшүүн, гуша гаран жэлнүүдэй туршада «Байгал» сэтгүүлэй ахамад редактор ябаhан Сергей Сультимович Цырендоржиев.
Залуу наhандаа задарюун, арад зондоо үнэн зүрхэнhөө туhалжа, эхэ нютагаа магтан ябаhан, буряад хэлэнэй бүхы баялигые ухаандаа шэнгээhэн, буряад арадайнгаа хүгжэмэй зэмсэгүүд дээрэ наадажа шададаг байhан эдэ гурбанай нүхэсэл үльгэр шэнги, анда зоной барисаандал бүхэ, зүрхэ сэдьхэлэй уярхаар энхэргэн дулаан, наhантайгаа хахасатараа этигэл дүүрэн…
Галмандахын Баттулгын бэшэhэн энэ хүгжэм Буряадай Оперо болон баледэй театрай ордон соо үнгэрhэн Балданцэрэнгийн Баттүвшинэй зохёохы үдэшэ дээрэ түрүүшынхиеэ Чингис Павловай нэрэмжэтэ оркестрэй гүйсэдхэлгөөр зэдэлээ. Баттүвшин өөрөө суур, сууха хуур, лимбэ гэhэн урданай буряад арадай хүгжэмэй зэмсэгүүд дээрэ наадаба.
Апрелиин 21-дэ энэл "Анда нүхэдэй магтаал" гэhэн шэнэ зохёолнай “Баян талын аялгын” тоглолтодо дахяад Оперын ордон соо зэдэлхэ гээд дуулганабди.
