Түрүүшын зүжэг тиигээд лэ, «Үбгэжөөл ба далай» гээд нэрлэгдэhэн, эндэ, Э. Хемингуэйн өөрөө хэлэhээр: «Хүниие диилэхэ гэжэ байдаггүй» гэhэн гол бодол зүжэгэй hуури табина. Юундэб гэхэдэ бүхы наhаараа далайн эрьедэ ажаhуужа загаhашалаад, түрүүшынхиеэ айхабтар томо загаhатай ушаржа, тэмсэнэ. Ород хэлэн дээрэ табигдажа байhан энэ зүжэг соо хүнэй ухаанhаа эхитэй хүсэн байгаалиин тэнэг хүсэн хоёрой тэмсэл харагшын сэдьхэлые эзэлхэл байха гэhэн найдал байна.
Хоёрдохи зүжэг буряад хэлэн дээрэ, Ч. Айтматовай романай удхаар найруулагдажа байна, тиихэдээ тэрэнь «Манкурт» гэжэ нэрлэгдэнхэй. Тэрэ Манкурт гээшэнь хэн гээшэ юм гэжэ тайлбарилжа байhанай хэрэг үгы юм бэшэ аал даа, хүн бүхэн мэдэнэ ха юм. Гэбэшье байгаалиин табисуураар үгтэhэн хүнэй эгээл үнэтэй баялигые – ухаан бодолые буляажа абаха арьяатан абаритай Дунда Аазиин нүүдэл арадуудай хэрзэгы муухай аргануудай нэгэн эндэ харуулагдана…
Олег Юмов энэ үедэ яhала мэдээжэ боложо ябаhан найруулагша, Москва, Свердловск, Новосибирск, Красноярск хотонуудаар зүжэгүүдые шүүмжэлэгшэдэй болон харагшадай hайн сэгнэлтэтэйгээр, амжалтатай табиhан, манайшье театрта хоёр зүжэг табиhан байгаа. «Турандот», тиихэдэ «Максар. Шуhата тала» гээд харагшаднай мартажархёогүй байна бэзэ. Энэ табигдажа байhан зүжэгүүдыень шэмэглэхэеэ Монголой театрай болон киногой уран зурааша Шагдарсүрэнгийн Тэгшбаяр ерэнхэй, эдэ хоёр зүжэг тэрэнэй Орос гүрэндэ байгуулжа байhан түрүүшын хүдэлмэри болохо юм байха.
