Оперно театрай дуушан, Буряад Республикын арадай артист Билигма Ринчиновагай гурбан дискhээ бүридэhэн “Абын үндэр үреэлээр” гэhэн шэнэ СD дискдэ классическа дуунуудhаа гадна, арба гаран шэнэ буряад дуунууд орожо, үнгэрhэн жэлэй майн 18-да үдэшын 5 сагта энэ ушараар дэлгэгдэhэн дуунай концерт-наадан Буряадай Гүрэнэй СССР-эй арадай артист Г. Цыдынжаповай нэрэмжэтэ оперо болон баледэй академическэ театрай танхим соо дуунай ехэ hайндэр боложо үнгэрөө бэлэй.
Тиихэдэ театрай залуу дуушад Аюна Базаргуруева, Намхайн Мөнхзул, Мэргэн Санданов, Сультим Дашипылов мүн Монголhоо Нарангэрэлэй Ундрал гэгшэд Билигмаагаа дэмжэжэ, тайзан дээрэhээ харагшадаа баясуулаа hэн. Билигмаа Зүдхэли нютагта Агын тойрогой Тогто хуасай омогой Ринчинэй Жамбалай ехэ бүлэ соо наймадахи үхибүүн боложо түрэhэн юм. Аба эжынь 11 хүүгэдые үндылгэжэ, гарыень ганзагада, хүлыень дүрөөдэ хүргэжэ, бултыень хүнhөөл дутуугүй хүнүүд болгожо табиhан байна. Бага наhаниинь юрын буряад хүүгэдээхитэйл адли байгаа – хотонойнгоо хүүгэдээр наадажа, урда хадаяа гаража, сэсэг түүhээр, тибhэ малтажа эдиhээр, Зүдхэли, Эреэбхэй горхонуудтаа умбаhаар, жаргалтайгаар лэ өөдөө болоhон хүн гээшэл даа. Бага наhанhаа хойшо дуулаха дуратай байгаа, Билигмаада аба эжын дамжуулhан хоолой байна гэжэ хэлэжэ болохо. Аха дүүнэрынь бултадаа дууладаг, юрэдөө дууладагүй хүн гэжэ бүлэдэнь үгы юм. Оперын дуушан мэргэжэлтэйшье hаа, Билигмаа буряад дуу дуулаха аргагүй дуратай. Юундэб гэхэдэ, буряад хэлэн – түрэл хэлэниинь, багаhаань буряад дуугаал дуулажа үндыhэн басаган ха юм. «Сансар» студиин бэлдэжэ гаргаhан, 2013 ондо жэлэй эрхим CD гэжэ тодорhон энэ проект гурбан дискhээ бүридэнэ: 1-дэхи диск соонь классическа дуунууд – аари, романснууд. 2-дохи диск соонь hайхан буряад, мэдээжэ дуунууд оронхой: Б. Цырендашиевай, Ю. Ирдынеевэй, А. Андреевэй, Н. Дамирановай гээд лэ олон дуун. 3-дахи дискэнь шэнэ дуунуудhаа бүридэнхэй. Монголой, Буряадаймнай нэрэтэй композиторнуудай шэнэ буряад дуунууд: Базыр Цырендашиевай, Н. Жанцанноровой, Б Шаравай, Б. Бальжинимаевай, Г. Баттулгын, арадайш дуунууд байха. Дуушамнай энэ диск бэшэхэдээ, зорижо Улаан-Баатар ошожо, буряад магтаал, дуунуудаа Монголой оперно театрай симфоническа оркестртэй дуулаhан байна. Тэндэ оркестрэй бэшэлгэ хэхэдэ ехэ hайн студинууд олон байдаг. Харин классическа дуунуудаа дирижер Владимир Рыловтэй Москвагай Гостелерадиогой оркестртэй бэшэhэн юм.
Билигмаа энэ дискэеэ абынгаа дурасхаал сэдьхэлдээ мүнхэлжэ, «Абын үндэр үреэлээр» гээд нэрэ үгөө бэлэй, юуб гэбэл, энэ диск, энэ концерт абань аргагүй хүлеэhэн юм…
Тэрэ гэhээр бүхэли нэгэ жэл үнгэршэбэ. Эдэ үдэрнүүдтэ Билигмаа Ринчинова, Намхайн Мөнхзул, Бадма Гомбожапов гурбан Агын тойрогоор ябажа ерэхэ гэжэ бэлдэжэ байна. Тэрэл "Абын үндэр үреэлээр" гэһэн дискынгээ арамнай үргэлжэлүүлэн, энэ удаа нютагайхидайнь урда аялга hайхан дуугаа дэлгэхэ. Апрелиин 30-да Алханада, майн 1-дэ Дулдаргада, майн 2-то Зүдхэлидэ, майн 3-да Могойтодо, майн 4-дэ Агада болохо дуунай үдэшэнүүдтэ Билигмаагай басаган Сарюна Бальжинимаева, мүн тиихэдэ гэр бүлынь ансамбль хабаадалсаха.
