Тэрэнэй нэрэ республика доторнай үргэнөөр мүнхэлэгдэнхэй. Жэшээлхэдэ, Буряадай Гүрэнэй Ажалай Улаан тугай орденто Хоца Намсараевай нэрэмжэтэ академическэ драмын театр, Хэжэнгын дунда hургуули болон Хэжэнгэ тосхоной үйлсэнүүдэй нэгэн Хоца Намсараевай нэрэ зүүнхэй юм. Тиихэдэ ажалшадай депутадуудай Улаан-Үдын горсоведэй 1969 оной майн 21-нэй тогтоолоор Улаан-Үдэ хотын Железнодорожно райондохи Сперанскиин үйлсэ Хоца Намсараевай нэрэмжэтэ болгогдоо hэн. Хоца Намсараев наhанайнгаа hүүлшын жэлнүүдтэ Улаан-Үдын Коммунистическа үйлсөөр ажаhуугаа, тэрэ гэрэйнь ханада мүнхэлэлгын дурасхаалай самбар хадагдаа hэн. Мүнөө Хоца Намсараевай нэрэмжэтэ үйлсэ хадаа Железнодорожно районой шэнэ олон дабхар гэрнүүдэй ербыhэн, элдэб транспортын олоор ябадаг үйлсэнүүдэй нэгэн болонхой. Энэ үйлсөөр багшанарай училищи, республикын 1-дэхи интернат-hургуули, «Теплоприбор» завод болон бусадшье томо предприятинууд оршодог. Эндэ ажаhуудаг, ажалладаг хүнүүд, hуража байдаг hурагшад болон оюутад үндэр нэрэтэй уран зохёолшын нэрэмжэтэ гудамжатай хуби заяагаа холбоhондоо омогорхожо ябадаг юм. Тиигэжэ мүнөөдэр тэрэ гудамжын аманда уран зохёолшын нэрэ хүндые үргэhэн баяр наадан хараалагданхай. Нэрыень зүүжэ ябаhан Буряад театр Хоца Намсараевай алдарта ойдо зорюулагдаhан хэмжээ ябуулга ерэхэ намартаа харагшадтаа дурадхаха байха.
